Qazaqstan syrtqy ister ministrligi 2018 jylǵy 28 qańtarda Aýǵanstan astanasy Kabýlda bolǵan "adamgershilikke jatpaityn, ondaǵan beibit adam qaza bolǵan, terroristik áreketti qatań aiyptaityny" týraly málimdeme taratty.
"Jedel járdem kóligin qylmystyq maqsatqa paidalaný – asa jantúrshigerlik, arsyz jáne zulym əreket. Qazaqstan Aýǵanstan halqy jetkilikti túrde zorlyq-zombylyqty basynan keshkenin málimdei otyryp, halyqaralyq qoǵamdastyqty óńirlik yntymaqtastyqty keńeitý men aldyn alý diplomatiiasy quraldaryn tiimdi paidalaný arqyly osy elge taǵy da qoldaý kórsetýge shaqyrady" delingen málimdemede.
Sonymen birge Qazaqstan Kabýldaǵy shabýyldan qaza tapqandardyń otbasylary men týystaryna qaiǵysyna ortaqtasyp kóńil aityp, zardap shekkenderdiń tezirek saýyǵyp ketýine tilektes ekenin bildirgen.
Eske sala keteiik, senbi kúni Kabýldyń ortalyǵynda úkimet ǵimarattary, sheteldik elshilikter men dúkender ornalasqan jerde bolǵan terrorlyq shabýyldan mert bolǵandar sany, resmi ókilderdiń málimeti boiynsha, 95 adamǵa jetken. 190 adam jarylystan zardap shekken.
Ishki ister ministrliginiń habarlaýynsha, terrorshylar tekserý-baqylaý beketterinen ótip ketý úshin jedel járdem kóligin paidalanǵan. Kýágerlerdiń sózinshe, jarylys tolqyny oqiǵa bolǵan jerden júzdegen metr alysqa deiin sezilgen.
"Taliban" radikaldyq qozǵalysy jarylysqa jaýapkershilikti alatynyn málimdegen.
Buǵan deiin 21 qańtarda Kabýldaǵy Intercontinental qonaqúiine jasalǵan terrorlyq shabýyl saldarynan qaza tapqan 25 adamnyń 14-i sheteldikter. Olardyń arasynda Ýkrainanyń alty azamaty jáne bir qazaqstandyq bar. Ol shabýylǵa da jaýapkershilikti "Taliban" qozǵalysy ózine alǵan bolatyn.
