Ústimizdegi jyldyń 29 tamyzy men 3 qyrkúiek aralyǵynda «Astana EKSPO-2017» Halyqaralyq mamandandyrylǵan kórmesinde Ońtústik Qazaqstan oblysynyń kúnderi ótti. Elbasynyń «Bolashaqqa baǵdar: rýhani jańǵyrý» atty baǵdarlamalyq maqalasynda kórsetilgen «Týǵan jer» baǵdarlamasyn keńinen nasihattaý maqsatynda «Aiǵaq» telearnasy Ońtústik Qazaqstan oblysynyń ákimi Janseiit Túimebaevtyń qoldaýymen elimizdiń bas qalasyna «Uly dala avtokerýenin» uiymdastyryp jolǵa shyqqan edi. Joba jetekshisi jáne delegatsiia basshysy - OQO Qoǵamdyq keńesiniń múshesi, OQO máslihatynyń depýtaty Dýlat Ábish.
«Týǵan jer» baǵdarlamasy el men jerdiń erteńin oilaǵan arnaly tolǵanystardyń biri. Elbasy óz sózinde «Qazaqstannyń qasietti jerleriniń mádeni-geografiialyq beldeýi — neshe ǵasyr ótse de, bizdi kez kelgen rýhani jutańdyqtan saqtap, aman alyp shyǵatyn simvoldyq qalqanymyz ári ulttyq maqtanyshymyzdyń qainar bulaǵy. Ol — ulttyq biregeilik negizderiniń basty elementteriniń biri» degen bolatyn. Osyǵan bailanysty, týǵan jerdiń keremetterin kórermenge keńinen nasihattap, «Týǵan jer – qutty mekenim» jáne «Ǵajaiyp Qazaqstan» jobalary boiynsha «Aiǵaq» telearnasynyń úzdiksiz atqaryp kele jatqan jumystary el nazarynda.
Aita keteiik, «Astana EKSPO-2017» kórmesine jolǵa shyqqan Qoǵamdyq delegatsiia quramynda Ońtústik Qazaqstan oblysynyń Qurmetti azamaty Moldabai Iliasov, Qazyǵurt aýdandyq Qoǵamdyq Keńesiniń múshesi Muhtar Momynov, Qazaqstannyń mádeniet qairatkeri Nyshan Tólegenov, Ordabasy aýdanynyń Qurmetti azamaty Rymkúl Ertaeva, «Nur Otan» Partiiasy Ordabasy aýdandyq filialynyń tóraǵasy Bostandyq Jakei, Arys qalasynyń Qurmetti azamaty, Qoǵamdyq Keńestiń múshesi, "Yrys aldy-yntymaq" uiymynyń aýdandaǵy tóraǵasy Balqybekov Qonysbek jáne aýdandyq ákimdiktiń bólim basshylary, mektep direktorlary men belsendi jastar, telearnanyń shyǵarmashylyq tobynan quralǵan 30 – dan astam adam bar.
1 qyrkúiek kúni Qurban ait namazynan keiin Shymkent qalasyndaǵy Táýelsizdik saiabaǵynan jolǵa shyǵatyn delegatsiiany saltanatty shyǵaryp salý rásimine Ońtústik Qazaqstan oblystyq máslihatynyń hatshysy Qairat Balabiev, OQO Ishki saiasat basqarmasynyń basshysy Bolat Tólegen, aýdandyq ákimdikterdiń bólim basshylary qatysyp, aqjol tiledi.
Munan keiin 6 avtokólikke otyrǵan azamattar Shymkent kóshelerimen júrip otyryp, shahardyń negizgi qaqpalarynyń biri sanalatyn Bozaryq ainalma joly arqyly Batys Eýropa – Batys Qytai halyqaralyq avtodálizimen saparǵa shyqty.
Kieli jáne tarihi mańyzy bar jerlerge aialdap, uly tulǵalarǵa taǵzym etýdi maqsat tutqan avtokerýen munan keiin Ordabasy aýdany Temirlan aýylyna aialdady. Onda qara kúshtiń iesi Qajymuqan atyndaǵy murajaiy men kesenesine bas suǵyp, baba rýhyna quran baǵyshtady. Aýdan ákimi R.Qaiypjanov bul sharanyń tanymdyq, tárbielik mán-mańyzy tereń ekenin tilge tiek etip, jolaýshylarǵa sát sapar tiledi.
"Uly dala avtokerýeni" Batys Eýropa-Batys Qytai avtodálizi arqyly júrip otyryp, 60 shaqyrymdy eńserip, tarihi eskertkish Qyzylkópirge aialdady. Astana tórinde ótip jatqan EKSPO-2017 Halyqaralyq kórmesine arnaiy bara jatqan qoǵamdyq delegatsiiany aýyl azamattary qushaq jaia qarsy alyp, sát-sapar tilep, qazynaly qariialar aq batasyn berdi.
"Sabaqty ine sátimen". Bul sapar musylman jurtynyń ulyq merekesi Qurban Aitpen tuspa -tus kelgendikten, qurbandyq shalyp, ata-baba árýaǵyna quran aiattaryn túsirdi. Munan keiingi sapar kieli Otyrar jerindegi Arystan bab kesenesi basynda jalǵasady.
«Astana EKSPO-2017» Halyqaralyq kórmesi men Elbasynyń «Týǵan jer – qutty mekenim!» jobasy aiasyndaǵy «Uly dala avtokerýeni" Otyrar aýdanyna da aialdady. Elimizdegi kieli jerleriniń biri Arystan bab kesenesi - Alash jurtynyń ziiarat etetin qasietti mekeni. Sondyqtan, Kieli mekendegi Arystan bab kesenesine arnaiy barǵan avtokerýen músheleri kesene janyndaǵy emdik qasieti bar qudyqtan sý iship, baba rýhyna quran baǵyshtady.
Túrkistan qalasyndaǵy Q.A.Iassaýi kesenesi "Uly dala avtokerýeni aialdaǵan kelesi oryn boldy. Ordabasy, Báidibek, Otyrar aýdandaryna aialdap, kieli shaharǵa taban tiregen qoǵamdyq delegatsiia músheleri tarihi oryndy aralap kórip, ulylarǵa taǵzym etti. Avtokerýenniń aldaǵy baǵyty Qyzylorda oblysy boldy.
OQO-ǵy birqatar tarihi oryndarǵa taban tirep, ata-baba rýhyna qurash baǵyshtaǵan delegatsiia músheleri 2-qyrkúiek kúni túngi saǵat 1.00-de Jezqazǵan qalasyna aialady. Jalpy 880 shaqyrymdy basyp ótken avtokerýen sapary ármen qarai Qaraǵandy qalasynda jalǵasady.
Qyrkúiektiń 3-kúni, iaǵni jeksenbi kúni 2000-myńǵa jýyq shaqyrym joldy júrip ótken "Uly dala avtokerýeni" Astanaǵa kelip jetti.
Bul kún "Astana EKSPO-2017" Halyqaralyq kórmesinde 6 kúnge jalǵasqan Ońtústik Qazaqstan oblysy kúnderiniń jabylýy rásimi ótip jatqan-dy. Osylaisha eldik sharaǵa ún qosýǵa arnaiy kelgen delegatsiia músheleri qazynaly aimaqtaǵy barsha turǵyndardyń ystyq sálemin astanalyqtarǵa jetkizdi. Al, halyqaralyq kórmede bir aptaǵa jýyq óz ónerlerin pash etip jatqan ońtústik ónerpazdary delegatsiia múshelerin qushaq jaia qarsy aldy.
"EKSPO-2017" Halyqaralyq kórmesine kirgen boida alǵashqy tanysý nysany Qazaqstannyń "Nur álem" pavilony boldy. Ondaǵy ozyq tehnologiialar men zamanaýi qurylǵylar kelýshilerdi tań tamasha etti.
Munan keiin, avtokerýen músheleri Ońtústik Qazaqstan oblysynyń Astana qalasyndaǵy kúnderi aiasynda «Etnoaýylda» uiymdastyrylǵan sharalar men «Qazanat» atshabarynda ulttyq at sporty túrlerinen uiymdastyrylǵan jarysty tamashalady. Atshabarǵa jinalǵan qaýym aýdaryspaq, qyz qýý, jamby atý, teńge ilý, qusbegilik jáne at ústinde jigitterdiń ónerin kórdi.
Budan bólek, jasóspirimder men jastar arasynda asyq atýdan, jastar jáne eresekter arasynda toǵyzqumalaqtan, kórermendar arasynda salmaǵy 35 keli bolatyn qoshqar kóterý saiystary ótti. Qoshqardy iyǵyna salyp 28 kótergen Berdiqul Əlfarabiǵa teń keler eshkim bolmady. Teńge alýdan Maǵjan Saparbekov júldeger atandy.
Jarys qorytyndysyna sai jeńimpazdarǵa qarjylai syilyqtardy "Nur Otan" Partiiasy OQOF tóraǵasynyń birinshi orynbasary Nurmahan Joldasov pen OQO Qoǵamdyq keńesiniń múshesi, OQO máslihatynyń depýtaty Dýlat Ábishter marapattady.
4-qyrkúiek kúni Astana qalasynan Shymkentke qarai jolǵa shyqqan «Uly dala avtokerýeni» alda Qaraǵandy oblysyna aialdap, aimaqtaǵy tarihi, kieli oryndarǵa aialdap, Jezqazǵan qalasy ákiminiń qabyldaýynda bolyp,Ulytaý jerindegi Joshy han, Alasha han kesenelerinde túsirilim jasaýdy josparlaýda.
OQO ákiminiń baspasóz qyzmeti
