«Astana» basketbol klýbynyń qyzmetin toqtatýynyń negizgi sebepteri ataldy. QR Sport komiteti klýbtyń sońǵy jyldardaǵy halyqaralyq jáne ishki arenadaǵy nátijeleri qoiylǵan mindetter men kútilgen kórsetkishterge sáikes kelmegenin málimdedi. Sonymen qatar sportty qarjylandyrýǵa qatysty zań talaptarynyń ózgerýi de klýbtyń aldaǵy taǵdyryna áser etken, dep habarlaidy ult.kz.
"«Astana» basketbol klýbynyń qyzmetin toqtatý týraly aqparatqa qatysty kelesini habarlaimyz.
Sońǵy jyldary klýbtyń halyqaralyq arenadaǵy nátijeleri alǵa qoiǵan mindetteri men kútken nátijelerge sáikes kelmedi.
VTB Biryńǵai ligasynyń ótken maýsymynyń qorytyndysy boiynsha «Astana» basketbol klýby sońǵy 12-orynǵa turaqtady. Komanda 44 matchtyń tek ekeýinde ǵana jeńiske jetip, jeńilis kórsetkishi 95 paiyzdan asty. Bul – klýbtyń VTB Biryńǵai ligasyndaǵy eń nashar nátije. Sonymen qatar, komanda sońǵy segiz jyl boiy atalǵan týrnirdiń plei-off kezeńine shyǵa almady.
Ishki arenada da «Astana» basketbol klýby alǵa qoiǵan maqsattaryna qol jetkize almady. Komanda Qazaqstan Kýbogy jolyndaǵy básekede ese jiberip, Ulttyq liganyń chempiondyq ataǵyn da ielene almady.
Ótken jyly sport salasyn qarjylandyrýdyń tiimdiligin arttyrýǵa baǵyttalǵan Qazaqstan Respýblikasynyń Zańy qabyldandy. Zańnyń negizgi erejeleri ulttyq qurama komandalardy damytýǵa basymdyq berip, sport rezervin qalyptastyrýǵa, sondai-aq biýdjet qarajaty esebinen legionerlerdi qarjylandyrýǵa tyiym salýǵa baǵyttalǵan.
Qazirgi tańda otandyq basketbol sportyn damytý tásilderin qaita qaraý jumystary júrgizilýde. Negizgi basymdyq jastar komandasyn damytýǵa, sapaly sport rezervin qalyptastyrýǵa jáne balalar men jasóspirimder sportyn qoldaýǵa beriledi", - delingen habarlamada.
