«Astana balet» teatry 9-10 qyrkúiekte Milan qalasynyń ortalyǵyndaǵy «Teatro Nuovo» sahnasynda óner kórsetetin bolady, dep habarlaidy "Ult aqparat" teatrdyń baspasóz qyzmetine silteme jasap.
Teatr gastroli Mádeniet jáne sport ministriginiń muryndyq bolýymen, «Rýhani jańǵyrý» ulttyq baǵdarlamasynyń aiasynda júzege asyrylyp otyr.
«Astana balet» teatrynyń ujymy «Jahandaǵy zamanaýi Qazaqstan mádenieti» jobasyn júzege asyrýǵa at salysyp, otandyq ónerdiń jaiharlaryn álem sahnalarynda tanytyp keledi.
«Biyl Astananyń 20 jyldyǵy atalyp ótýde. Osy oqiǵanyń aiasynda, biz, Astananyń eń jas teatrynyń shyǵarmashylyq izdenisterin italiiandyq kórermen nazaryna usynbaqshymyz. Trýppamyz úshin, gastrol - shyǵarmashylyqty yntalandyrýdyń kilti, álemniń dańqty qalasynyń aýditoriiasy aldynda kúshimizdi synap kórýdiń múmkindigi. Talǵampaz kórermen bizge qoshemet bildirer, degen úmittemiz», - deidi, teatr direktory Valerii Kúzembaev.
Onyń aitýynsha, teatr ózindik óner týyndylaryn ulttyq mol muraǵa súiene otyryp, álemdik mádeniet áserimen dúniege ákeledi.
Qazaqstannyń balet ujymy «Astana Balet Gala» atty mazmuny biregei kontserttik baǵdarlamany tartý etpek. Onyń ishine ulttyq horeografiianyń jaýharlarymen qatar, trýppa repertýaryndaǵy neoklassikalyq miniatiýralar enip otyr.
Baǵdarlamaǵa ulttyq boiaýy qanyq horeografiialyq miniatiýralar men balet úzindileri engen. Bul kompozitsiialardyń bári bai halyq dástúrimen, san-qarlylyǵy jáne mol qýatymen erekshelenedi. Ǵajap mýzyka, qaitalanbas kórkem beineler kórermen kóńilin baýrap alady.
Ulttyq taqyryptan bólek, kórermen qaýym teatr repertýaryndaǵy Rikardo Amarante qoiǵan neoklassikalyq spektaklderdiń úzindilerin tamashalai alady. Onyń «Love Fear Loss, «A fuego lento» baletteri kórermenniń ystyq yqylasyna bólenip keledi.
