Elordanyń kóptegen balabaqshasy memlekettik satyp alý protsedýralaryn zań buzýshylyqqa jol bere otyryp ótkizgen. Bul týraly QR Qarjy ministrligi Ishki aýdit komitetinen málim etti, dep habarlaidy "Ult aqparat".
Tekserý memlekettik satyp alýdyń veb-portalynda ótkizilgen. Onda mektepke deiingi uiymdarda, jetim balalar men ata-ana qamqorlyǵynsyz qalǵan balalarǵa arnalǵan bilim berý uiymdarynda tárbielenetin jáne bilim alatyn balalardy tamaqtandyrýdy qamtamasyz etýmen bailanysty taýarlardy satyp alý protsedýralary nazarǵa alyndy.
Anyqtalǵandai, Nur-Sultan qalasynyń mektepke deiingi mekemeleri biylǵy birinshi toqsanda balabaqsha tárbielenýshileri úshin azyq-túlik satyp alý rásimderin kóptegen buzýshylyqtarmen ótkizgen. Muny Nur-Sultan qalasy boiynsha Ishki memlekettik aýdit departamentine satyp alýǵa qatysqan jeke jáne zańdy tulǵalardan kelip túsken kóptegen aryz rastaidy.
«Júrgizilgen aýditorlyq is-sharalar barysynda mektepke deiingi kóptegen mekemede Taýar jetkizýshini tańdaý kriteriilerin esepteý bóliginde birdei buzýshylyqtarǵa jol berilgen. Bul tiisinshe satyp alý qorytyndysyna áser etti.
Aýdit obektileriniń mekenjaiyna anyqtalǵan buzýshylyqtardy joiý jáne olarǵa jol bergen tulǵalardyń jaýapkershiligin qaraý týraly nusqamalar jiberildi», - delingen vedomstvo málimetinde.
