Astana qalasynyń ákimi Áset Isekeshev Ortalyq kommýnikatsiialar qyzmetinde ótken baspasóz máslihatynda elordadaǵy qoǵamdyq kóliktegi bilettiń qymbattaýyna qatysty pikirin bildirdi, dep habarlaidy QazAqparat tilshisi.
Aldymen qala basshysy jaqynda qoǵamdyq kólikte bilet baǵasy qymbattaidy degen sybysqa qatysty oiyn aitty.
«Birden aitaiyn, bul kontekstten julynyp alynǵan aqparat. Kóptegen baǵdarlamalar boiynsha qoǵamdyq keńeste talqylaýlar júrgizilip jatqany belgili. Tilshilerge de bul rette áleýmettik jaýapkershilikti tanytýdy surar edim», - dedi ákim.
Onyń aitýynsha, birinshiden qoǵamdyq kólik jedel ósip kele jatqan megapolis úshin eń mańyzdy máselelerdiń biri bolyp tabylady.
«Kóptegen turǵyndardyń da shaǵym aityp jatatynyn bilesizder. Retke keltiretin jumystar barshylyq. Eki jyl buryn baǵdarlamany qolǵa alyp, belsendi túrde avtoparkterdi jańartyp, servisti jaqsartý baǵytynda jumys júrgizýdemiz. Sarapshylardyń baǵalaýynsha, nátije bar. Basty suraqtardyń biri - qarjylyq model. 2014 jyldan beri tarif kóterilgen joq. Odan beri eki devalvatsiia ótti, janar-jaǵarmaidyń baǵasy qymbattady. Dese de, tarif birde-bir márte kóterilmegen edi. Biz qazir avtoparktermen, kóliktik kompaniialarmen qarjylyq model týraly talqy ótkizip jatyrmyz. Kóptegen elderde bul baǵytta sýbsidiia bólinetini belgili», - deidi Áset Isekeshev.
Qala basshysynyń aitýyna qaraǵanda, avtoparkterdiń usynystary tyńdalǵan.
«Álbette, máslihatta sóz bolǵan esep aiyrysý tarifi - jol júrý qunynyń ózindik quny. Ol esep aiyrysý men sýbsidiia úshin mańyzdy. Avtoparkterdiń baǵany 300, 500 teńgege kóterýdi usynǵany belgili. Biraq, biz eń minimýmdy aldyq - ol 200 teńge. Bul esep aiyrysý tarifi janar-jaǵarmaidy satyp alý men jumysshylardyń ailyǵyn, avtoparkterdi jańartýdy qamtamasyz etýi kerek. Birinshi satyda jaǵdaidy tolyq túsiný úshin biz 200 teńgeni belgiledik», - dedi ol.
Ákimniń aitýynsha, qolma-qol aqshasyz, kartochkamen esep aiyrysý - qala ákimdigi úshin basymdyq bolyp tabylady.
«Álbette, bul suraq qoǵamdyq keńeste, sarapshylar keńesinde talqylanyp, máslihatqa, odan ary ákimdikke joldanady. Sodan keiin ǵana sheshim qabyldanady. Biraq bul týraly aqparat efirge burys ketip qalǵandyqtan, qazir aita ketkim keledi. Biyl biz kartochka boiynsha jol júrý qunyn kóterýdi kózdep otyrǵan joqpyz. Burynǵydai - 90 teńge bolyp qalady. Onyń ústine, ekinshi avtobýsqa tegin otyra alatyndai jaǵdaidy jasaǵan qalalardyń birimiz. Demek, bir baǵamen eki-úsh avtobýsqa minseńiz, ainalyp kelgende tarif eki esege tómen ekenin kóresiz. Biraq, kartochka arqyly tólemei, qolma-qol aqshamen tólegisi keletin adamdar úshin biz differentsiialdy tarif - 180 teńge etip engizemiz», - deidi ol.
Isekeshev osy sebepti kartochka alǵan adamǵa tiimdi bolatynyn atap ótti.
«Kartochkamen tóletý biz úshin nelikten mańyzdy? Eger barlyq adamdar kartochkamen tólese, biz tolyq jaǵdaidy kóre alamyz. Sodan keiin tarif boiynsha sheshim qabyldaimyz. Eger qalalyqtar jol júrý úshin 90 teńge tóleitin bolsa, qala ákimdiginen jyl saiyn 15 mlrd teńge bólinedi. Biraq, taǵy qaitalap aitamyn, jyldyń sońyna deiin qolma-qol aqshasyz tóleý kezindegi jol júrý baǵasy qymbattamaidy», - dep túidi Isekeshv.
