Qazaqstan halqy assambleiasy 1995 jyly qurylǵan. Quramynda 394 múshe bar.
Parlament Májilisine Qazaqstan halqy Assambleiasynan sailanǵan 9 depýtat eldegi barlyq etnostar atynan ókildik etedi.
Qazaqstan Jazýshylar Odaǵy 1925 jyly qurylǵan. Quramynda 810 múshesi bar. Parlamentte Jazýshylar Odaǵyna múshe qansha depýtat bar?
Saiasat, idealogiiany qoia turyp, arifmetika turǵysynda qarasaq, Májiliste QHA-daǵy 394-tiń 9-y otyrsa, QJO-daǵy 810-nan keminde 18 depýtat otyrýy kerek.
Buǵan qosa QJO-nyń 11 oblys pen elordadaǵy filialdarynyń basshylary nemese ókilderi jergilikti oblystyq, qalalyq, tipti aýdandyq máslihattarda bar ma? Joq bolsa nege? Ne kedergi?
Mandattar qaǵazben bekitilmese de, tájiribede qaǵidaǵa ainalý kerek dep oilamaisyzdar ma?
"Eldiń búgini men bolashaǵy jastardyń qolynda" degen urandar qai zamannan beri barlyq elderde aitylyp jatady. Aqiqatynda olai esh jerde, eshqashan bolmaǵan, bolmaidy da! Múlde! Sosyn memlekettik isti tek ekonomister men zańgerler, bylaisha aitqanda kásibi mamandar ǵana júrgizý az. Tipti olar dúniede joq geniiler bolsa da. Ideologtar da qansha tyrysqanymen asa eshteńe ózgermeidi. Qysqasy istiń basy-qasynda idealister bolmasa eshteńe ónbeidi. Al qalǵandary tek oryndaýshylar.
Qurmetti, aqyn-jazýshy, qalamger aǵalar, baýyrlar!
Sizder memlekettik saiasattan, memlekettik isten tys qalǵan saiyn, alystaǵan saiyn ulttan, halyqtan alystaisyzdar, ýaqyt pen urpaq aldyndaǵy paryz, táńirdiń bergen daryny men qudaidyń bergen qarymy aldyndaǵy qaryzdan alshaqtaisyzdar. Osyny túsiný kerek!
Óitkeni qoǵamǵa kerek idealister degen - SIZDER!
Qazaqqa kerekti qazaqtan basqa eshkim syrttan kep istep bermeidi. Jáne qazaqqa qazaqtan basqanyń jany ashymaidy.
El ortaq, jer ortaq, memleket ortaq. Sondyqtan bularǵa qatysty jaýapkershilik te - ortaq.
