Qazaqstan halqy Assambleiasy «Jańǵyrý joly» respýblikalyq jastar qozǵalysynyń múshesi Elina Paýli qazaq tilin tanymal etýdiń tyń tásilin usyndy, dep habarlaidy QazAqparat.
«Biz memlekettik tildi damytý týraly bastamalardy qoldai otyryp zamanaýi formatta jumys isteýimiz kerek. Mysaly, Tatarstanda jyl saiyn kúzde «Tatarsha diktant jaz» atty dúniejúzilik aktsiia ótedi. Oǵan álemniń 50 elinen ókilder qatysady. Tildi nasihattaityn bul aktsiia búkil álemge taraldy. Nege biz bul tájiribeni qoldana almaimyz? Árine, bizde ártúrli memlekettik tildi nasihattaityn diktanttar ótkiziledi. Biraq, ádette, biryńǵai aýqymdy format joq. Ondai sharalar aldyn ala habarlanbai, áleýmettik jelilerde jarnamalanbai uiymdastyrylady. Ol diktantty Qazaqstan aýmaǵynan tys jerlerge de taratýǵa bolady. Qazir álemniń kóptegen elderinde, ásirese TMD elderinde Abai ortalyqtary bar. Solardyń qoldaýmen osy jumysty atqarýǵa bolady», - dedi jastardyń ókili Prezident Joldaýyn talqylaýǵa arnalǵan dóńgelek ústelde.
Sondai-aq, ol memlekettik tildiń qoldanys aiasyn keńeitýde Qazaqstan halqy Assambleiasynyń jastaryna zor mindet artylyp otyrǵanyn jetkizdi.
«Til - halyq janyn tanýdyń kilti. Qazaqstandyqtardyń birligin nyǵaitýdyń mańyzdy faktory retinde memlekettik tildiń qoǵamdaǵy rólin arttyrý arqyly ony odan ári damytý jáne nasihattaý – assambleia jastary mindetteriniń biri. Biz erteń ata-ana bolyp óz balalarymyzdyń bolashaǵyn oilai otyra, olardyń qazaq tilin bilýine múmkindik berip, qoldaýymyz kerek. Memleket tarapynan búkil jaǵdai jasalyp otyr», - dedi «Jańǵyrý joly» respýblikalyq jastar qozǵalysynyń múshesi.
Onyń aitýynsha, qazaq tili Qazaqstan halqy birliginiń birden-bir faktory bolýǵa tiis.
«Bizder, kópultty elimizdiń azamattary qiyn-qystaý zamanda túrli ulttar men ulystardy baýyryna basyp, qushaq jaia qarsy alǵan qasietti qazaq halqyna qaryzdarmyz. Sondyqtan, elimizdiń tilin meńgerý - kópultty jastardyń, qazaqstandyqtardyń basty maqsaty», - dedi Elina Paýli.
