Qalibek Qýanyshbaev atyndaǵy Memlekettik akademiialyq qazaq mýzykalyq drama teatryna direktory Ashat Maemirov «Junior Eurovision-2019» baiqaýynda Erjan Maksimge jetpei qalǵan kórermenderdiń daýysyna qatysty pikirin bildirdi, – dep habarlaidy QazAqparat.
«Bizde bireý qulap qalsa, súrinip ketse sony talqylaidy. Al jetistikterdi jazbaimyz. Nege olai ekenin bilmeimiz? «Junior Eurovision-2019» án baiqaýyna qatysyp jatqanyn bárimiz bilip otyrdyq. Selqostyq bizde bar. Biraq, sol otyrǵan adamdar bireýdiń súringenin kórse, jinalyp alyp, talqylaidy. Jeńiske qýana almaimyz. Buny joqqa shyǵara almaimyz» dedi Ashat Maemirov tilshilerdiń suraǵyna jaýap bere otyryp.
Al jas ánshi shyrqaǵan ánniń kompozitory Hamit Janǵaliev bolsa, Erjan Maksimniń ónerine tóreshilerdiń bári joǵary upai bergenin aitady.
«Biraq, bizdiń kemshiligimiz – daýys bermegenimizde. Bul bizdiń Internettegi arzan ázilderge qumarmyz. Al elde ne bolyp jatqanyna mán bermeimiz» deidi ol.
Aita ketsek, Mádeniet jáne sport ministri Aqtoty Raiymqulova Polshada ótken «Junior Eurovision-2019» án baiqaýynda ekinshi oryn alǵan Erjan Maksimmen kezdesip, jas ónerpazdy jeńisimen quttyqtaǵan bolatyn.
Eske sala ketsek, Polshada ótken «Junior Eurovision-2019» án baiqaýynda baq synaǵan qazaqstandyq Erjan Maksim ekinshi oryn aldy. Qazylardyń bergen baǵasy boiynsha Erjan Maksim birinshi orynda edi. Al onlain daýys berý qorytyndysymen 79 upai jinady. Osylaisha qazaqstandyq ánshi jalpy 227 upaimen ekinshi oryn aldy.
QR Prezidenti Qasym-Jomart Toqaev Erjan Maksimdi án baiqaýyndaǵy júldesimen quttyqtaǵan edi.
Óz kezeginde Erjan Maksim qazaqstandyqtarǵa alǵysyn aitty.
«Qurmetti dostarym, apa-aǵalarym, ata-ájelerim. Maǵan daýys bergenderińiz úshin kóp-kóp rahmet! Osy jeńiske sizderdiń arqalaryńyzda jetip otyrmyn» dep jazdy ánshi.
