Foto: ortcom.kz
Búgin Prezident Joldaýyndada erekshe nazar aýdarylǵan salalardyń biri – bilim. Memleket basshysy jasandy intellektini meńgerý mektep qabyrǵasynan bastalýy qajet ekenin naqty atap ótti. Osy oraida Ult.kz tilshisi depýtat Ashat Aimaǵambetovten jasandy intellektiniń bilim salasyna yqpaly týraly surady.
Jasandy intellekt búginde tek meditsina, bilim nemese ǵylym salasymen ǵana shektelmeidi. Onyń áseri logistikadan bastap, áleýmettik júiege, zeinetaqy men ekonomikalyq protsesterge deiin jetip otyr. Bul týraly Májilis depýtaty Ashat Aimaǵambetov aitty.
– Balalarymyz 2023 jyldan beri jasandy intellektini kúndelikti ómirde paidalanyp júr. Tipti úi tapsyrmasyn oryndaýda jii qoldanady. Alaida shamadan tys nemese durys qoldanbaýdyń saldarynan kei oqýshylar qarapaiym suraqtarǵa jaýap berýde qinalyp júr. Sondyqtan eń áýeli biz jasandy intellektini qalai tiimdi paidalaný keregin úiretýimiz qajet, – dedi depýtat.
Aimaǵambetovtiń aitýynsha, jasandy intellekt – adam emes, tek júie. Ol berilgen derekke súienip tujyrym jasaidy. Sondyqtan oǵan tolyqtai senýge bolmaidy, aqparatty syni turǵydan baǵalai bilý – basty talap.
– Jasandy intellekt dáýirinde oqý saýattylyǵy erekshe mańyzǵa ie. Bul tek mátindi tez oqi salý emes, oqyǵandy tereń túsiný. Búginde kóptegen oqýshylar aqparatty qabyldaýda qinalady. Mundai jaǵdaida oqý saýattylyǵyn damytý – negizgi mindet, – dedi ol.
Depýtattyń pikirinshe, baǵalaý júiesiniń ózi ózgeredi. Nátijege emes, oqýshynyń tapsyrmany oryndaý protsesine, oilaý qabiletine basymdyq berilýi tiis. Sondai-aq oqýlyqtar, úi tapsyrmalary, muǵalimderdiń róli de jańasha sipat alady.
– «Jasandy intellekt muǵalimderdi almastyrady» degen pikir qate. Kerisinshe, jańa dáýirde bilim berýshilerdiń mańyzy arta túsedi. Biraq olardan jańa talaptar kútiledi: jasandy intellektini durys qoldana alatyn, ony oqytý protsesine tiimdi engize biletin, balalardy syni oilaýǵa jeteleitin muǵalimder qajet, – dedi Ashat Aimaǵambetov.
