QR Bilim jáne ǵylym ministri Ashat Aimaǵambetov elimizdiń barlyq ustazdaryna arnap hat joldady, dep habarlaidy "Ult aqparat".
«Qymbatty áriptes! Siz osy qiyn kezeńnen otbasyńyzben birge aman-esen ótip, densaýlyǵyńyzǵa esh qaýip tónbeitin jaǵdaida júrsiz degen úmittemin. Sizge pandemiia jaǵdaiyndaǵy baǵa jetpes ustazdyq eńbegińiz úshin, jankeshti jumysyńyz ben kez kelgen ýaqytta balalarymyzǵa tireý bolýǵa degen izgi nietińiz úshin shyn júrekten alǵysymdy bildiremin. Biz sizben osynaý qiyn ýaqytty eńserý jolyndamyz. Koronavirýs pandemiiasy barshamyzdyń turmys-tirshiligimizge áser etti. Súrinbei ótýge tiis túrli synaqtarǵa toly ýaqyt bastaldy. Osydan jarty jyl buryn mundaidy tipti elestetpegen edik. Ókinishke orai, jaqyn adamdarymyzdan aiyrylyp jatyrmyz. Bilim jáne ǵylym júiesi adami qundylyqtardy dáriptegen, urpaqty tárbielep, bilim bergen arda azamattarynan – sala ardagerlerinen, bizdiń qymbatty áriptesterimizden aiyrylýda. Týystary men dostary kóz jumǵan áriptesterimniń qaiǵylaryna ortaqtasyp, kóńil aitamyn. Dál qazirgi qiyn kezeńde jaqyndarymyz ben óz ómirimizdiń, densaýlyǵymyz ben qaýipsizdigimizdiń mańyzy men qadirin túsinip, baǵalaýdy úirenip jatyrmyz. Kez kelgen qiyndyq bizdi shyńdai túsip, synaqtar jigerimizdi qairap, rýhymyzdy myqty etedi», - dep jazylǵan ministrdiń árbir muǵalimge joldaǵan hatynda.
Osy oraida ol osynaý qiyn-qystaý kezeńde birge bolýymyz asa mańyzdy ekenin aita kele: «Bizdiń kúshimiz – bizdiń birligimizde. Biz kez kelgen qiyn mindetterdi birde-bir balany eskerýsiz qaldyrmai, birlese otyryp sheshe alamyz. Áriptesim, sizge mynany aitqym keledi! Qazir bizge balalarymyz ben olardyń bolashaǵy úshin jáne tek bilimi ǵana emes, densaýlyǵy men moraldyq jaǵdaiy úshin de úlken jaýapkershilik júktelip otyr. Oqýshylarymyzdyń meilinshe qaýipsiz ári jaily ortada bilim alýyna qajetti jaǵdaidyń barlyǵyn jasaýymyz kerek», - dedi.
Osy oraida ol ustazdardyń tek mektepte ǵana emes, ómirde de kóshbasshy ekenine senim bildirdi.
«Jaǵdai ornyǵady. Dárigerlermen birigip biz indetti birge jeńemiz, burynǵy ómir birtindep qalpyna kele bastaidy. Oǵan deiin bárimiz oqýshylar men ata-analarǵa jáne bir-birimizge tireý bola bilýimiz qajet. Alǵys aitýdyń eshqashan artyqshylyǵy bolmaidy. Sondyqtan men sizge tórtinshi toqsanda atqarǵan eren eńbegińiz úshin taǵy bir márte raqmetimdi aitqym keledi. Siz – naǵyz batyrsyz. Sizdiń qýatty qoldaýyńyzdy sezinip otyrmyn. Sol sebepti de erteń balalarymyzdyń bilimin jetildirý jolynda esh kedergi bolmaitynyna senemin», - dep atap ótti A.Aimaǵambetov.
Osy hat 8 tamyzdan beri elimizdiń barlyq óńirindegi ustazdarǵa elektrondy jeke poshtasyna joldanýda. Hatty alǵan muǵalimder áleýmettik jelilerde Bilim ministrine arnap jaýaptaryn jazýda.
Kúlánda Batyrbekova esimdi kásipker hatty tapjylmai oqyp shyqqanyn atap ótken.
«Keremet! Jai sózben, adamnyń sanasyna arnalǵan erekshe hat. Ustazdarǵa rahmetin aita otyryp,osy basymyzǵa túsip jatqan qiynshylyqtan birge shyǵýǵa, shydamdylyq pen sabyrlylyqqa shaqyryp otyr.Pedagog bolmasam da,osy bilim salasynyń janashyry bolyp, investorlardyń qaýymdastyǵynyń tóraiymy retinde,ortaq pochtamyzǵa, jekemenshik mektep pen balabaqshalardyń basshylaryna hatty jiberdim. Halyqtyń barlyǵymen bóliskim keldi. Bólisýge turatyn hat qoi....», - dep jazdy K. Batyrbekova áleýmettik jelide.
Sonymen qatar, taǵy Tolqyn Batyrbaiqyzy esimdi ustaz da atalǵan hatqa bailanysty óz pikirin bildirgen.
«Keshe túnde sabaqtaryma daiyndalyp otyryp, elektrondy pochtamdy ashyp qalsam, bas ustazymyz Ashat Qanatulynan hat kelip tur. Hatty oqyp kózime jas keldi. Hat sońynda boiymda áldebir kúsh pen jiger paida bolǵandai... Qarapaiym ustazǵa Ministr myrzadan jyly lebizge toly hat kelse, qandai kúide bolady dep oilaisyzdar? Árine, qýanasyń, jumysyńa degen shabytyń oianady, mamandyǵyńa degen qurmet artady. Mine, osyndai túrli emotsiialardy basymnan ótkerdim», - deidi Tolqyn Batyrbaiqyzy.
