QR Bilim jáne ǵylym ministri Ashat Aimaǵambetov pandemiia kezeńinde qarajattan qinalǵan stýdentterge qoldaý kórsetýdi usyndy, dep habarlaidy "Ult aqparat".
«Pandemiia saldarynan stýdentter oqýyna ýaqytyly tóleý múmkindikteri azaiǵanyn kórip otyrmyz. Jalpy ekonomikalyq ahýaldy ózderińiz kórip otyrsyzdar. Sondyqtan JOO tarapynan da qoldaý jumystaryn júrgizý qajet dep sanaimyn jáne eki máselege toqtalǵym keledi», - dep atap ótti ministr onlain apparat jinalysynda.
Eń aldymen ministr qaryzdary bar stýdentterge bólip tóleý múmkindikterin berýdi usyndy.
«Biz júrgizgen taldaý nátijesinde osyndai máseleler anyqtaldy. Sondyqtan bólip tóleýge múmkindik qarastyrýlaryńyzdy suraimyn.
Ekinshiden, biz alǵan aqparatqa sáikes, biraz JOO qazir oqýdyń baǵasyn kóterýdi josparlap otyr eken. Sondyqtan bul másele boiynsha da sizderge ótinish bar – osy ahýaldy bile otyryp, joǵary oqý oryndarynda baǵany ósirmeý. Bul - óte mańyzdy. Sondyqtan bul máseleni sizder qarastyryp, tiisti sheshim qabyldaidy dep senemin», - dedi Ashat Aimaǵambetov.
Sonymen birge, ministr JOO-lardy qoldaý boiynsha baǵdarlama daiyndalyp jatqanyn, onyń jaqyn kúnderi jariialanatynyn jetkizdi.
