Bilim jáne ǵylym ministri Ashat Aimaǵambetov mektepterde ótip jatatyn aqyly olimpiadalardyń ótkizilýin qoldamaitynyn málim etti, dep habarlaidy QazAqparat tilshisi.
«Biz daryndy balalardy ary qarai da qoldaimyz. Biraq bilim men bilim júiesi separator, segregatsiia qyzmetin atqarmaýy tiis. Biz kerisinshe, álsiz mektepterdi úzdik mektepterdiń deńgeiine súireýimiz kerek. Dese de, daryndy balalarmen jumys jeke turýy tiis. Qazaqstannyń daryndy balalary halyqaralyq intellektýaldyq saiystarda úzdik oryndar alyp júr. Sońǵy 3 jylda ǵana qazaqstandyq oqýshylar 444 altyn medal, 540 kúmis, 848 qola medal ielengen. Álbette, bul baǵyttaǵy jumysty jalǵastyrý kerek», - dedi Ashat Aimaǵambetov Tamyz konferentsiiasynda.
Bilim jáne ǵylym ministri osy rette elimizde ótip jatqan aqyly olimpiadalar men baiqaýlar týraly sóz qozǵady.
«Aqyly baiqaýlar kóbeiip ketti. Ata-analar keide amalsyz balalaryn qatystyrýǵa májbúr bolady. Keide ol baiqaýlardyń paidasy da joq. Keibir internet olimpiadalarda qaǵazǵa basyp, aqsha tólep, tapsyrma alyp úiine qaitqan bala búkil otbasy bolyp, tapsyrmany sheship, aqyry qandai da bir oryn alady. Bul qanshalyqty paidaly, qanshalyqty durys? Sondyqtan olimpiadalar boiynsha Bilim jáne ǵylym ministrliginiń ustanymy bar – mektepterde qazirgidei kóp ári formatta aqyly olimpiadalar bolmaýy kerek. Olimpiadalar men baiqaýlar bizde bolady. Olar kerek! Biraq bul rette ministrlik tarapynan naqty reglament bolady», - dedi Bilim jáne ǵylym ministri.
