بٸلٸم جەنە عىلىم مينيسترٸ اسحات ايماعامبەتوۆ مەكتەپتەردە ٶتٸپ جاتاتىن اقىلى وليمپيادالاردىڭ ٶتكٸزٸلۋٸن قولدامايتىنىن مەلٸم ەتتٸ, دەپ حابارلايدى قازاقپارات تٸلشٸسٸ.
«بٸز دارىندى بالالاردى ارى قاراي دا قولدايمىز. بٸراق بٸلٸم مەن بٸلٸم جٷيەسٸ سەپاراتور, سەگرەگاتسييا قىزمەتٸن اتقارماۋى تيٸس. بٸز كەرٸسٸنشە, ەلسٸز مەكتەپتەردٸ ٷزدٸك مەكتەپتەردٸڭ دەڭگەيٸنە سٷيرەۋٸمٸز كەرەك. دەسە دە, دارىندى بالالارمەن جۇمىس جەكە تۇرۋى تيٸس. قازاقستاننىڭ دارىندى بالالارى حالىقارالىق ينتەللەكتۋالدىق سايىستاردا ٷزدٸك ورىندار الىپ جٷر. سوڭعى 3 جىلدا عانا قازاقستاندىق وقۋشىلار 444 التىن مەدال, 540 كٷمٸس, 848 قولا مەدال يەلەنگەن. ەلبەتتە, بۇل باعىتتاعى جۇمىستى جالعاستىرۋ كەرەك», - دەدٸ اسحات ايماعامبەتوۆ تامىز كونفەرەنتسيياسىندا.
بٸلٸم جەنە عىلىم مينيسترٸ وسى رەتتە ەلٸمٸزدە ٶتٸپ جاتقان اقىلى وليمپيادالار مەن بايقاۋلار تۋرالى سٶز قوزعادى.
«اقىلى بايقاۋلار كٶبەيٸپ كەتتٸ. اتا-انالار كەيدە امالسىز بالالارىن قاتىستىرۋعا مەجبٷر بولادى. كەيدە ول بايقاۋلاردىڭ پايداسى دا جوق. كەيبٸر ينتەرنەت وليمپيادالاردا قاعازعا باسىپ, اقشا تٶلەپ, تاپسىرما الىپ ٷيٸنە قايتقان بالا بٷكٸل وتباسى بولىپ, تاپسىرمانى شەشٸپ, اقىرى قانداي دا بٸر ورىن الادى. بۇل قانشالىقتى پايدالى, قانشالىقتى دۇرىس? سوندىقتان وليمپيادالار بويىنشا بٸلٸم جەنە عىلىم مينيسترلٸگٸنٸڭ ۇستانىمى بار – مەكتەپتەردە قازٸرگٸدەي كٶپ ەرٸ فورماتتا اقىلى وليمپيادالار بولماۋى كەرەك. وليمپيادالار مەن بايقاۋلار بٸزدە بولادى. ولار كەرەك! بٸراق بۇل رەتتە مينيسترلٸك تاراپىنان ناقتى رەگلامەنت بولادى», - دەدٸ بٸلٸم جەنە عىلىم مينيسترٸ.
