Bilim jáne ǵylym ministri Ashat Aimaǵambetov qazaqstandyq ǵalymdardy Ǵylym kúnimen quttyqtady, - dep habarlaidy QazAqparat.
«Búgin - Ǵylym kúni! Bul salada 22 myńnan astam maman jumys isteidi. Ǵylymsyz, jańa tehnologiialar men bilimdi engizbesten ekonomikada da, áleýmettik salada da tabysqa jetý múmkin emes, sondyqtan ǵylymnyń damýyna óz ómirin arnaǵan jáne barlyq kúsh-jigerin jumsaityn adamdardy baǵalaýymyz qajet. Koronavirýs pandemiiasy búkil álemde ǵalymdardyń róli qanshalyqty mańyzdy ekenin kórsetti. Bizdiń ǵalymdarymyz, atap aitqanda QR BǴM Ulttyq biotehnologiia ortalyǵynyń qyzmetkerleri shtamnyń ózi bolmastan, nebári 6 kún aralyǵynda koronavirýsty anyqtaýǵa arnalǵan biregei test-júie ázirledi», - dep jazdy ministr Facebook-tegi paraqshasynda.
Ashat Aimaǵambetovtiń jazýynsha, qazaqstandyq PTR júiesi joǵary dáldikke ie ári onyń ústine Ýhanda tabylǵan koronavirýsty ǵana emes, SARS-CoV-2 sekildi basqa koronavirýs shtamdaryn da anyqtaýǵa qabiletti. Qazir biologiialyq qaýipsizdik máseleleri jónindegi ǵylymi-zertteý institýty men Ulttyq biotehnologiia ortalyǵynyń ǵalymdary COVID-19 koronavirý infektsiiasyna qarsy vaktsina ázirleýge kirisken.
«Qazaqstan ǵylymy zor áleýetke ie. Ǵalymdardyń eńbekteri álemniń jetekshi ǵylymi jýrnaldarynda jii jariialanady. 2011 jylmen salystyrǵanda «Scopus» derekter bazasynda qazaqstandyq ǵalymdardyń jariialanymdarynyń jalpy sany 34,5 ese, «Web of Science» derekter bazasynda - 59 ese ósti. Keiingi bes jyl ishinde otandyq ǵalymdardyń árbir besinshi jariialanymy álemniń ǵylymi jýrnaldarynyń úzdik 25-tigine ilindi. ;ylymi jariialanymdar avtorlarynyń sany 3 ese ósti», - deidi Ashat Aimaǵambetov.
Ministr degenmen ǵylymdy odan ári damytý úshin eleýli ózgerister, basqarý júiesi men qarjylandyrý tetikterin jetildirý kerektigin aitady. Osyǵan bailanysty Memleket basshysy Úkimetke qarjylandyrýdy aitarlyqtai ulǵaitýdy tapsyryp, qazir júieni sapaly ózgertý boiynsha túbegeili sharalar qabyldanyp jatyr.
«Birinshiden biyl alǵash ret ǵylymi-zertteý institýttarynyń infraqurylymyn jańartýǵa qarajat bólindi. Kelesi jyly biz ǵylymi uiymdardyń jabdyqtary men zerthanalaryn belsendi túrde jańartamyz. Ekinshiden ǵylymi baǵdarlamalardy granttyq jáne baǵdarlamalyq-maqsatty qarjylandyrýǵa arnalǵan baiqaýlar endi úsh jylda bir ret emes, jas ǵalymdar arasyndaǵy baiqaýlar sekildi jyl saiyn ótkiziledi. Úshinshiden qarjyny bólý boiynsha ashyqtyqty arttyrý boiynsha jumys bastaldy. Ótinim sapasyna talaptar da qataiady. Tórtinshiden ministrlik joǵary oqý oryndary men akademiialyq ǵylymnyń integratsiiasyn jandandyrmaq. Biz konkýrstyq negizde «akademiialyq basymdylyq ortalyqtary» qurylatyn úzdik 10 oqý ornyn irikteýdi sheshtik. Besinshiden ǵylymdy qarjylandyrý kólemi 2020-2022 jyldarǵa eki ese ulǵaidy. 2025 jylǵa qarai ol jalpy ishki ónimniń 1 paiyzyn quraidy», - deidi ministr.
Sondai-aq ǵalymdarǵa álemdik ǵylymi ortalyqtarynda zertteý taǵylymdamasynan ótý úshin arnaiy granttardy bólý josparlanǵan. Qazirdiń ózinde til bilimi, tarih, filosofiia, ádebiet jáne basqa salada irgeli zertteýlermen ainalysatyn iri institýttardyń ǵylymi jobalaryn turaqty qarjylandyrýǵa kóshirý jumystary júrgizilýde. Olar granttar alýǵa táýeldi bolmai, turaqty zertteýler júrgizýi tiis.
Osy jáne ózge de kómek-qoldaýlardy aita kele ministr ǵalymdardy búgingi merekesimen quttyqtady.
«Qurmetti ǵalymdar! Qymbatty áriptester! Sizder elimizdiń tiregi jáne bizdiń maqtanyshymyzsyzdar. Sizder - Qazaqstandy jańashyldyqqa bastaityn jáne tyń serpilisterge jeteleitin aldyńǵy qatarly qaýymnyń ókilisizder. Jumystaryńyzǵa tabys, biregei ideialar men zor densaýlyq tileimin! Merekelerińizben, ardaqty aǵaiyn!» - dep túidi ministr.
