Búgin elordadaǵy Qazaq memlekettik zań ýniversiteti ǵimaratynda bilim salasyndaǵy «Adaldyq alańy» jobalyq keńsesi ashyldy, dep habarlaidy QazAqparat tilshisi.
Jobalyq keńseniń ashylý rásimine Bilim jáne ǵylym ministri Ashat Aimaǵambetov pen Sybailas jemqorlyqqa qarsy is-qimyl agenttiginiń tóraǵasy Alik Shpekbaev arnaiy qatysyp, tiisti memorandýmǵa qol qoidy.
«Búgin biz bilim salasy boiynsha jobalyq keńse ashqaly otyrmyz. Jalpy, bilim salasynda jemqorlyqpen kúresti kúsheitip, jemqorlyqqa múldem tózbeýshilik mádenietin qalyptastyrý qajet. Ózderińiz kórip te otyrsyzdar, bilim salasynda qazir biraz keleńsiz oqiǵalar oryn alýda. Bilim - óte aýqymdy sala. 10-15 million Qazaqstan azamatynyń bilim salasyna qalai bolsa da, kúndelikti qatysy bar. Tek muǵalimderdiń ózi 300 myńǵa jýyqtaidy. Bilim salasynda bolyp jatqan máselelerdiń barlyǵy halyqtyń basty nazarynda ekeni belgili. Sondyqtan biz osyndai sheshim qabyldadyq», - dedi qujatqa qol qoiý rásiminde Bilim ministri.
Al agenttik tóraǵasy Alik Shpekbaev Qazaq memlekettik zań ýniversiteti elimizdegi sybailas jemorlyqtyń «iisi» de joq joǵary oqý oryndarynyń biri sanalatynyn basa aitty.
«Qazaqstan búgingi tańda jemqorlyqtan taza, zamanaýi memleket qurýda. Zamanaýi eldiń eń negizgi basymdyǵy - ashyqtyq, aiqyndyq, qoǵam aldynda esep beretin memleket túzý. Munan keiingi basymdyq - kásibi, derbes, ekonomikalyq turǵyda yntalandyrylǵan memlekettik apparat qalyptastyrý», - dedi Alik Shpekbaev.
