QR Bilim jáne ǵylym ministri Ashat Aimaǵambetov salada joǵarydan berilgen tapsyrmalardyń oryndalmaýy jiilep ketkenin aitty, dep habarlaidy QazAqparat tilshisi.
Ministrdiń aitýynsha, eldegi joǵary oqý oryndary men óńirlerdegi bilim basqarmalary Memleket basshysynyń, ministrlik pen Úkimettiń tapsyrmalaryn oryndaýda sylbyrlyq tanytyp otyr.
«Jumysqa kirisken eki apta ishinde saladaǵy jumys barysyn zerdelep, tiisti taldaý jumystaryn júrgizdik. Osy kezde kóptegen tapsyrmalardyń oryndalmai jatqany anyqtaldy. Ýniversitet rektorlary men bilim basqarmasynyń basshylaryn osy sebepti búgin arnaiy shaqyrtyp otyrmyz», - dedi ministr arnaiy jiynda.
JOO rektorlaryn kezek-kezek turǵyzǵan ministr áshkerelengen zańsyzdyqtar boiynsha qyzmettik tekserý júrgiziletinin aitty.
«Aýdit barysynda 57 pýnkt boiynsha zańsyzdyq tabylǵan ýniversitetter bar. Bir ýniversitet qyzmetkerlerdi konkýrssyz jumysqa qabyldaǵan. Endi bir bilim ordasy sabaqqa qatyspaǵan magistranttardy prokýratýra aralasqannan keiin ǵana oqýdan shyǵarǵan. Bir ýniversitet 28 stýdentke, taǵy bir ýniversitet 128 stýdentke shákirtaqyny zańsyz taǵaiyndaǵan», - degen Ashat Aimaǵambetov qyzmettik tekserý osy atalǵan kemshilikterdi rastap shyqsa, jol bergen rektorlarǵa qatań sógis jariialanatynyn eskertti.
«Qazir joǵary oqý oryndaryna da, bilim basqarmalaryna da halyq tarapynan shaǵym kóp. Kei oblystarda muǵalimderge zańdy eńbekaqysy men eńbek demalysynyń aqshasy áli aýdarylmaǵan. Jumysty júielendirmesek, jalpy bilim salasyna el ishinde ókpe-renish kóp. Sony joiyp, bassyzdyqtardyń aldyn alý qajet. Olai bolmaǵan jaǵdaida buryn sińirgen qyzmetterińizge qaramaimyz», - dedi Ashat Aimaǵambetov.
Sondai-aq, onyń aitýynsha, sońǵy 6 jylda memlekettik grantta oqityn stýdentter memleket aldyndaǵy mindetinen jaltarýǵa beiim bolyp alǵan.
Ashat Aimaǵambetov mundai bassyzdyqqa zańnyń solqyldaqtyǵy jol ashyp otyrǵanyn aitady.
«Ministrlik stýdentterdiń jumysqa ornalasý derekterine monitoring jasap otyrady. Osy monitoring sońǵy 6 jylda grantta oqyǵan stýdentterdiń aqyrǵy kýrsta oqýdan shyǵyp ketýi jiilegenin kórsetip otyr. Bir jylda 800 stýdent oqýdan ketken ýniversitetter bar. Bul zańnamanyń solqyldaqtyǵy dep aitýǵa bolady. Osy solqyldaqtyqty paidalanyp, keibir stýdentter memleket aldyndaǵy mindetinen jaltaryp júr. Jyldar boiy tegin oqyp keledi de, sońǵy kýrsta shyǵyp ketedi. Keiin ony aqyly negizde jalǵastyra salady. Bul - tegin oqyǵan jyldar úshin joldama boiynsha eńbek etpeýdiń nemese memleket shyǵynyn qaitarmaýdyń amaly. Zańnamanyń osy kemshin tusyn bekemdeý qajet», - dedi ol.
Ministr qazirgi tańda joǵary oqý oryndaryna akademiialyq erkindik berilip otyrǵanyn da atap ótti. Onyń aitýynsha, byltyr qosymsha 20 myń grant bólinse, biyl taǵy 5000 grant bólindi.
