قر بٸلٸم جەنە عىلىم مينيسترٸ اسحات ايماعامبەتوۆ سالادا جوعارىدان بەرٸلگەن تاپسىرمالاردىڭ ورىندالماۋى جيٸلەپ كەتكەنٸن ايتتى, دەپ حابارلايدى قازاقپارات تٸلشٸسٸ.
مينيستردٸڭ ايتۋىنشا, ەلدەگٸ جوعارى وقۋ ورىندارى مەن ٶڭٸرلەردەگٸ بٸلٸم باسقارمالارى مەملەكەت باسشىسىنىڭ, مينيسترلٸك پەن ٷكٸمەتتٸڭ تاپسىرمالارىن ورىنداۋدا سىلبىرلىق تانىتىپ وتىر.
«جۇمىسقا كٸرٸسكەن ەكٸ اپتا ٸشٸندە سالاداعى جۇمىس بارىسىن زەردەلەپ, تيٸستٸ تالداۋ جۇمىستارىن جٷرگٸزدٸك. وسى كەزدە كٶپتەگەن تاپسىرمالاردىڭ ورىندالماي جاتقانى انىقتالدى. ۋنيۆەرسيتەت رەكتورلارى مەن بٸلٸم باسقارماسىنىڭ باسشىلارىن وسى سەبەپتٸ بٷگٸن ارنايى شاقىرتىپ وتىرمىز», - دەدٸ مينيستر ارنايى جيىندا.
جوو رەكتورلارىن كەزەك-كەزەك تۇرعىزعان مينيستر ەشكەرەلەنگەن زاڭسىزدىقتار بويىنشا قىزمەتتٸك تەكسەرۋ جٷرگٸزٸلەتٸنٸن ايتتى.
«اۋديت بارىسىندا 57 پۋنكت بويىنشا زاڭسىزدىق تابىلعان ۋنيۆەرسيتەتتەر بار. بٸر ۋنيۆەرسيتەت قىزمەتكەرلەردٸ كونكۋرسسىز جۇمىسقا قابىلداعان. ەندٸ بٸر بٸلٸم ورداسى ساباققا قاتىسپاعان ماگيسترانتتاردى پروكۋراتۋرا ارالاسقاننان كەيٸن عانا وقۋدان شىعارعان. بٸر ۋنيۆەرسيتەت 28 ستۋدەنتكە, تاعى بٸر ۋنيۆەرسيتەت 128 ستۋدەنتكە شەكٸرتاقىنى زاڭسىز تاعايىنداعان», - دەگەن اسحات ايماعامبەتوۆ قىزمەتتٸك تەكسەرۋ وسى اتالعان كەمشٸلٸكتەردٸ راستاپ شىقسا, جول بەرگەن رەكتورلارعا قاتاڭ سٶگٸس جارييالاناتىنىن ەسكەرتتٸ.
«قازٸر جوعارى وقۋ ورىندارىنا دا, بٸلٸم باسقارمالارىنا دا حالىق تاراپىنان شاعىم كٶپ. كەي وبلىستاردا مۇعالٸمدەرگە زاڭدى ەڭبەكاقىسى مەن ەڭبەك دەمالىسىنىڭ اقشاسى ەلٸ اۋدارىلماعان. جۇمىستى جٷيەلەندٸرمەسەك, جالپى بٸلٸم سالاسىنا ەل ٸشٸندە ٶكپە-رەنٸش كٶپ. سونى جويىپ, باسسىزدىقتاردىڭ الدىن الۋ قاجەت. ولاي بولماعان جاعدايدا بۇرىن سٸڭٸرگەن قىزمەتتەرٸڭٸزگە قارامايمىز», - دەدٸ اسحات ايماعامبەتوۆ.
سونداي-اق, ونىڭ ايتۋىنشا, سوڭعى 6 جىلدا مەملەكەتتٸك گرانتتا وقيتىن ستۋدەنتتەر مەملەكەت الدىنداعى مٸندەتٸنەن جالتارۋعا بەيٸم بولىپ العان.
اسحات ايماعامبەتوۆ مۇنداي باسسىزدىققا زاڭنىڭ سولقىلداقتىعى جول اشىپ وتىرعانىن ايتادى.
«مينيسترلٸك ستۋدەنتتەردٸڭ جۇمىسقا ورنالاسۋ دەرەكتەرٸنە مونيتورينگ جاساپ وتىرادى. وسى مونيتورينگ سوڭعى 6 جىلدا گرانتتا وقىعان ستۋدەنتتەردٸڭ اقىرعى كۋرستا وقۋدان شىعىپ كەتۋٸ جيٸلەگەنٸن كٶرسەتٸپ وتىر. بٸر جىلدا 800 ستۋدەنت وقۋدان كەتكەن ۋنيۆەرسيتەتتەر بار. بۇل زاڭنامانىڭ سولقىلداقتىعى دەپ ايتۋعا بولادى. وسى سولقىلداقتىقتى پايدالانىپ, كەيبٸر ستۋدەنتتەر مەملەكەت الدىنداعى مٸندەتٸنەن جالتارىپ جٷر. جىلدار بويى تەگٸن وقىپ كەلەدٸ دە, سوڭعى كۋرستا شىعىپ كەتەدٸ. كەيٸن ونى اقىلى نەگٸزدە جالعاستىرا سالادى. بۇل - تەگٸن وقىعان جىلدار ٷشٸن جولداما بويىنشا ەڭبەك ەتپەۋدٸڭ نەمەسە مەملەكەت شىعىنىن قايتارماۋدىڭ امالى. زاڭنامانىڭ وسى كەمشٸن تۇسىن بەكەمدەۋ قاجەت», - دەدٸ ول.
مينيستر قازٸرگٸ تاڭدا جوعارى وقۋ ورىندارىنا اكادەمييالىق ەركٸندٸك بەرٸلٸپ وتىرعانىن دا اتاپ ٶتتٸ. ونىڭ ايتۋىنشا, بىلتىر قوسىمشا 20 مىڭ گرانت بٶلٸنسە, بيىل تاعى 5000 گرانت بٶلٸندٸ.
