Foto: Nur.kz
Májilistiń Áleýmettik-mádeni damý komitetiniń tóraǵasy, depýtat Ashat Aimaǵambetov bilim grantyna ie bola almaǵan talapkerlerge keńes berdi. Bul týraly ol áleýmettik jelidegi paraqshasynda jazdy.
«Kommentterde jáne jekeme byltyrǵy jyldaǵydai osyndai mazmundaǵy suraq taǵy da kóp qoiylyp jatyr. Sondyqtan qysqasha óz oiymdy qaitalaiyn.
Bastysy áli de grantty jeńip alýǵa múmkindik bar. Nege?
Birinshiden, igerilmegen birneshe myń grant qaitadan úilestiriledi. Iaǵni grant alǵan talapkerlerden keiin turǵan talapkerlerge UBT-da jinaǵan upai sanyna sáikes beriledi. Sony kútýge bolady.
Ekinshiden, ákimdikterdiń granttary bar. Birneshe myń grant jergilikti biýdjetten bólinedi.
Úshinshiden, «Qazaqstan halqyna» qorynyń granttary taǵy bar.
Tórtinshiden, keibir talapkerler túrli sebep boiynsha jeńip alǵan granttarynan bas tartady. Olardyń sany da az bolmaidy. Ol granttar da qaita taǵaiyndalady.
Besinshiden, tipti eshteńe bolmasa, ýniversitetke aqyly túrde túsip, keiin jaqsy oqyp, GPA joǵary bolsa, bilim alý kezinde bosaǵan bos grantty utyp alýǵa bolady.
Altynshy, «gap year» arqyly bir jyl daiyndalyp, qaitadan UBT tapsyryp, grantty jeńip alýǵa bolady. Ol meniń óz basymnan ótken oqiǵa. Bul da jaqsy sheshim.
Jetinshiden, kolledjge túsýge bolady. Kolledjde grant kóp, qajetti mamandyqtar boiynsha kolledj bitirgender naryqta tapshy. Kerek bolsa, keiin ári qarai JOO-ǵa túsip, qysqa merzimde joǵary bilim alyp shyǵýǵa da bolady.
Kórip otyrǵandaryńyzdai múmkindikter óte kóp. Bári alda. Tolyq málimet alý úshin ýniversitetterdiń qabyldaý komissiiasyna jolyǵý kerek», - dep jazdy Ashat Aimaǵambetov.
