Bilim jáne ǵylym ministri Ashat Aimaǵambetov bilim berý máseleleri boiynsha zańnamaǵa engizilgen ózgerister týraly aitty, dep habarlaidy"Ult aqparat".
«Qabyldanǵan zańdaǵy mańyzdy normalardyń biri – balalarǵa qosymsha bilim berý úshin memlekettik tapsyrys institýtyn engizý. Ol týraly keńinen tarqatyp aitqan bolatynmyn. Endi memlekettik tapsyrys memlekettik-jekemenshik áriptestik aiasynda da jekemenshik uiymdarda ornalastyrylady. Bul memleket tarapynan úlken shyǵyndardy qajet etpei-aq balalardyń sektsiialarǵa, úiirmelerge jáne basqa da damytý ortalyqtaryna barýyna qatysty máselelerdi kezeń-kezeńimen sheshýge múmkindik beredi», - dep jazdy ministr jelidegi paraqshasynda.
Ashat Aimaǵambetov ekinshiden balabaqshalar, mektepter men kolledjder memlekettik attestattaýdan ótetinin atap ótti. Iaǵni uzaq ýaqyt boiy talqylanǵan norma qabyldanǵan. Attestattaý – syrtqy monitoring jáne bilim berý uiymdarynyń belgilengen standarttar boiynsha oryndaǵan jumystaryn baǵalaityn qural bolady.
«Eń bastysy, attestattaý tek problemalardy aiqyndaýshy represivti qural emes, anyqtalǵan problemalardy joiýǵa baǵyttalǵan naqty usynystar berý tetigi. Attestattaý bes jylda bir ret júrgiziledi. Ol arqyly bilim berý uiymdarynda beriletin bilimniń sapasy anyqtalyp, ata-analar, oqýshylar men pedagogter arasynda saýalnama júrgiziledi, materialdyq-tehnikalyq baza, kadr quramy jáne basqa da aspektiler boiynsha belgilengen talaptarǵa sáikestigi baǵalanady. Úshinshiden, úlgilik oqý josparlary men oqý baǵdarlamalary bilim berý protsesine engizilgenge deiin mindetti túrde saraptamadan jáne aprobatsiiadan ótkiziledi. Iaǵni endi oqý protsesine jańa baǵdarlamany engizý úshin aldymen mindetti túrde saraptama, keiin aprobatsiia júrgiziledi. Osylaisha oryn alýy múmkin kemshilikter anyqtalatyn bolady. Bul óte mańyzdy norma, jańa oqý baǵdarlamalaryn engizýge bailanysty jumystarda asyǵystyq jasamaý kerek. Árine, bul norma ministrlikti shekteidi, alaida osy arqyly jan-jaqty oilastyrylǵan, ǵylymi negizdelgen jáne synalǵan baǵdarlamalardy engizýdiń mehanizmi jumys isteidi», - deidi ministr.
Ashat Aimaǵambetov sonymen qatar ministrliktiń mektep oqýlyqtary jáne oqý-ádistemelik keshenderiniń qurylymy men mazmunyna qoiylatyn talaptardy belgileý quzyretin aiqyndaityn túzetý qabyldanǵanyn jetkizdi. Bul oqýlyqtardyń sapasyn arttyrýǵa baǵyttalǵan mańyzdy norma bolyp otyr.
«Tórtinshiden, ministrlik bilim berý uiymdaryna alyp kirýge jáne onda paidalanýǵa tyiym salynatyn zattardyń tizimin bekitetin bolady. Bul norma oqý ornynda bilim alýshylardyń qaýipsizdik talaptaryn saqtaýy úshin jáne aldyn alý sharalaryn kúsheitý úshin engizildi. Besinshiden, zańda qashyqtan bilim berýge qatysty jańa normalar paida boldy. Qashyqtan oqytý uǵymy jáne qashyqtan oqytýdy uiymdastyrý qaǵidalaryn bekitý jónindegi ýákiletti organnyń quzyreti bekitildi. Qashyqtan bilim berýge qatysty talaptar aiqyndalady», - dep túidi ministr.
