"Qazaqstan Respýblikasynyń keibir zańnamalyq aktilerine dini qyzmet jáne dini birlestikter máseleleri boiynsha ózgerister men tolyqtyrýlar engizý týraly" jańa zań jobasyna sáikes memlekettik jáne áskeri qyzmetshilerdiń dini ustanymyna qatysty tek úsh shekteý ǵana usynylyp otyr. Bul týraly QR Din isteri jáne azamattyq qoǵam ministri Nurlan Ermekbaev málim etti, dep habarlaidy Sputnik Qazaqstan tilshisi.
"Memlekettik qyzmetshilerge, onyń ishinde áskeri qyzmetshilerge úsh shekteý ǵana qoiylyp otyr. Birinshiden, olar ózderiniń qyzmettik múmkindikterin dini birlestikterdiń paidasyna nemese múddesine paidalanbaýy kerek. Ekinshiden, olar basqa adamdardy dini birlestikterdiń qyzmetine qatysýǵa májbúrlemeý kerek. Úshinshiden, memlekettik jáne áskeri qyzmetshiler ózderi dini birlestikterdiń bastamashysy nemese resmi múshesi bola almaidy", — dedi búgin Májiliste Ermekbaev jańa zań jobasynyń tanystyrylymynda.
Onyń aitýynsha, ókinishke qarai, qazirde memlekettik qyzmetshilerdiń óz laýazymdyq múmkindikterin paidalanyp, qolastyndaǵy adamdarǵa qysym kórsetip, olardy dini is-áreketke májbúrleitin jaǵdailar bar eken.
"Muny boldyrmaý úshin osyndai normalar kerek. Óitkeni tek búgingi kúndi emes, bolashaqty da oilaýymyz kerek. Eń aldymen, memlekettik qyzmetshiler óz múmkindikterin kez kelgen dini birlestiktiń múddesi úshin paidalanbaýy kerek. Olar - beitarap, tek memleketke qyzmet etýi qajet. Ózderi dini birlestikterdi qura almaidy", — dedi ministr.
"Osy ǵana, basqa shekteý joq. Olar, mysaly, demalys ýaqytynda meshitke nemese shirkeýge erkin bara alady, qurban shala alady. Biraq jumys ýaqytynda emes. Eshqandai ar-ojdan bostandyǵy buzylmaidy. Al áskerde sarbazdar jalpy tártipke baǵynýy kerek", — dep atap ótti Ermekbaev.
