polisia.kz
Qaraǵandyda 6505 áskeri bóliminiń áskeri qyzmetshileri 101 jastaǵy ardagerdi quttyqtady, - dep habarlaidy Ult.kz Polisia.kz-ke silteme jasap.
Olar Uly Otan soǵysynyń ardageri, 101 jastaǵy Grigorii Stepenkoǵa arnaiy baryp, qurmet kórsetti. Ardagerdi quttyqtaýǵa brigada komandiri Maqsat Qyrǵyzbaev, onyń tárbie jáne áleýmettik-quqyqtyq jumys jónindegi orynbasary Maqsat Muqaev, bólim ofitserleri men áskeri orkestr qatysty.
Ulandyqtar ardagerdiń úiine baryp, jyly lebizin bildirip, gúl men merekelik syilyqtar tabystady. Áskeri orkestr ardagerge maidan jyldaryndaǵy súiikti áýenderin oryndap berdi.
Grigorii Stepenko 1925 jyly 10 sáýirde Voronej oblysynda dúniege kelgen. 1943 jyly Pavlodar oblysynan maidanǵa shaqyrylǵan. Alǵashqy urystaryn 2-Ýkrain maidanynda pýlemetshi retinde bastaǵan. Ol Kýrsk-Orel shaiqasyna, Belgorod, Orel, Harkov, Kýrsk, Kenigsberg, Varshava qalalaryn azat etýge qatysqan. Sondai-aq, Dnepr ózenin keship ótý operatsiiasyna da atsalysty. Soǵystyń sońǵy kezeńinde Zabaikale maidanynyń 39-armiiasyna qarasty 56-atqyshtar polkiniń quramynda Qiyr Shyǵysta shaiqasty.
Ardager II dárejeli Otan soǵysy ordenimen, III dárejeli Dańq ordenimen, "Erligi úshin", "Jaýyngerlik eńbegi úshin", "Germaniiany jeńgeni úshin", "Varshavany azat etkeni úshin", "Kenigsbergti alǵany úshin" jáne ózge de mereitoilyq medaldarmen marapattalǵan.
Ardager qonaqtarǵa alǵysyn bildirip, maidan jyldaryndaǵy estelikterin bólisti, ulandyqtarǵa batasyn berip, qyzmetterine tabys tiledi.
