Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektory Janseiit Túimebaev ardager oqytýshy, professor, Qurmetti ǵylym qyzmetkeri, Resei Jaratylystaný akademiiasynyń akademigi Láila Ahmetovamen kezdesti.
Júzdesýde taraptar jýrnalistika salasyndaǵy, sonyń ishinde áskeri jýrnalistikanyń túitkildi máselelerin talqylap, damytý jolyn qarastyrdy.
Kezdesý barysynda Láila Seisembekqyzy ýniversitet rektory Janseiit Túimebaevqa bilikti jýrnalisterdi daiarlaý boiynsha oqý ordasynda júrgizilip jatqan jumystar týraly aitty.
Óz kezeginde QazUÝ basshysy ýniversitettegi tabandy eńbegi úshin jáne otandyq áskeri jýrnalistikanyń damýyna ólsheýsiz úles qosqany úshin qurmetti professorǵa alǵysyn jetkizdi. Sondai-aq óz sózinde rektor Láila Ahmetovany 70 jasqa tolǵan mereitoiymen quttyqtady.
«Siz otandyq jýrnalistika salasyna birneshe býyn shákirtterdi tárbielegen ónegeli oqytýshy, bilikti ǵalymsyz.
Ýniversitetimizdiń ardager ustazy retinde elý jyldan astam ýaqyttan beri qara shańyraq QazUÝ-da jemisti eńbek etip kelesiz. Áskeri jýrnalistika salasynda irgeli zertteýler júrgizip, ǵylymi-pýblitsistikalyq maqalalar jazyp, mazmundy monografiialar shyǵardyńyz. Ekinshi dúniejúzilik soǵys tarihyna qatysty tyń derekter jinap, qazaqstandyqtardyń maidandaǵy erligin pash ettińiz. Búginge deiin qol jetkizgen tabystaryńyz halyqaralyq ǵylymi qaýymdastyqta moiyndalyp, bedeldi marapattarǵa ie boldyńyz. Qazaqstannyń eńbek sińirgen mádeniet qairatkeri, Qurmetti ǵylym qyzmetkeri, Resei Jaratylystaný akademiiasynyń akademigi, Eýraziialyq televiziia jáne radio akademiiasynyń akademigi atandyńyz. Sizdiń nátijeli eńbekterińiz ben jetken jetistikterińiz bilim alýshy jastarǵa úlgi-ónege. Ýniversitet ózińizdei zerdeli ǵalymdaryn maqtan tutady», – dedi rektor.
Janseiit Túimebaev QazUÝ-ǵa sińirgen eńbegi úshin kórnekti ustaz-ǵalym Láila Seisembekqyzyn «Ál-Farabi» Kúmis medalimen marapattady.
Qaragóz SIMÁDIL,
ál-Farabi atyndaǵy QazUÝ-diń
Baspagerlik, redaktorlyq jáne dizainerlik óner kafedrasynyń oqytýshysy
