QR Qarýly Kúshteri Bas shtaby basshysynyń orynbasary Serik Boranbaev arnaýly áskeri jiyn bólimsheleriniń qai qalalarda qurylatynyn aityp berdi, dep habarlaidy QazAqparat.
Onyń aitýynsha, áskeri jiyndar Qarýly Kúshter Bas shtabynyń kelisimimen jáne ákimderdiń sheshimimen eki jylda bir ret ótip turady.
«Jiyn ótkizýge oblys pen respýblikalyq mańyzy bar qala basshylarynyń sáikes qaýlysy negiz bola alady. Odan ózge akt qabyldaýdyń qajeti bolmaidy. Biraq, elimizge alǵash ret engizilgen tótenshe jaǵdai kezeńinde Qarýly Kúshterdiń kez kelgen áreketi Memleket basshysynyń sheshimi negizinde júrgizilýi tiis. Sondyqtan, arnaýly jiyn ótkizý týraly Jarlyq qajet boldy», - dep túsindirdi Serik Boranbaev Ortalyq kommýnikatsiialar qyzmetinde ótken brifingte.
Onyń aitýynsha, Jarlyqqa qaramastan, áskeri mindettilerdi arnaýly jiynǵa shaqyrý birneshe óńirde ǵana josparlanyp otyr.
«Jarlyq ákimderdi aýmaqtyq áskerdi tolyq kólemde qurýǵa mindettemeidi, tek qana sondai quqyq beredi. Qazirgi ýaqytta Nur-Sultan, Almaty qalalarynda, Almaty, Qyzylorda, Pavlodar, Aqmola oblystarynda arnaýly jiyn bólimsheleri quryldy. Aqtóbe, Atyraý oblystarynda áskeri mindettilerdi shaqyrý jalǵasýda. 13 sáýir kúni Shymkent qalasy men Qaraǵandy oblysynda, 14 sáýirde - SQO, 15 sáýirde - Jambyl, 17 sáýirde - Túrkistan oblysynda shaqyrý bastalady. Al BQO, ShQO, Qostanai jáne Mańǵystaý oblystarynda arnaýly jiyn ótkizý máselesi qarastyrylmaǵan», - dedi S. Boranbaev
Sonymen birge, spiker Prezident Jarlyǵyn áskeri mindettiler ǵana emes, el azamattarynyń kópshiligi oń qabyldaǵanyn jetkizdi.
«Jarlyq shyqqan soń tótenshe jaǵdai kezinde aýmaqtyq ásker qataryna qosylǵysy kelgen azamattar habarlasty. Erteńgi kúni-aq barlyq óńirde jergilikti áskeri basqarý organdaryna eriktiler kele bastady. Jarlyqqa sáikes, shaqyrý merzimi men shaqyrýshylar sanyn ákimdikter retteidi, sondyqtan shaqyrý josparlanǵan ákimdikterge túsindirý jáne uiymdastyrý jumystary júrgizildi», - dedi QR QK Bas shtab ókili.
Aita keteiik, 2 sáýir kúni Memleket basshysy Qasym-Jomart Toqaev áskeri mindettilerdi arnaýly jiynǵa shaqyrý týraly Jarlyq shyǵarǵan edi.
