Qazaqstan Táýelsizdiginiń 30 jyldyǵyna orai Áskeri-áýe kúshteri armiia aviatsiiasynyń jaýyngerlik tikushaqtary kók aspanda táýelsiz elimizdiń simvoly – Memlekettik týdy qalyqtatyp alyp ushty. Bul týraly QazAqparat Qorǵanys ministrligine silteme jasap habarlaidy.
Osylaisha, eń úzdik ushqyshtar ekipajdary «Meniń Týym – meniń Otanym» aktsiiasyna qatysty.
Ushqysh-mergender – ÁÁK armiia aviatsiiasynyń bastyǵy polkovnik Nurlan Baidýllaev, aviatsiia bazasynyń komandiri polkovnik Maqsutbek Ádilbaev Mi-171Sh tikushaǵymen elorda aspanynda Qazaqstannyń Memlekettik týyn qalyqtatyp alyp ushty. Bul kórinisti oryndaýda olarmen tájiribeli ushqyshtar men shtýrmandar basqarǵan Mi-17 buramaly qanatty tikushaqtar áýede ilesip ushty.
Aktsiiaǵa qatysýǵa iriktelgen áskeri ushqyshtar – áskeri paradtardyń, «KADEX» qarý-jaraq pen áskeri-tehnikalyq múlik halyqaralyq kórmesine qatysqandar. Olardyń sheberliginiń arqasynda júzdegen oqý-jaýyngerlik tapsyrmalar sátti oryndalyp, respýblikalyq jáne halyqaralyq oqý-jattyǵýlar, sondai-aq baiqaýlar men jarystarda úzdik nátijelerge qol jetkizildi.
«Tý – ár memlekettiń basty simvoldarynyń biri, eldiń egemendigi men birtutastyǵynyń belgisi. Qazaqstan halqy úshin mańyzdy kúndi merekeleý qarsańynda oqý-jattyǵý ushýlaryn oryndaý arqyly aktsiiaǵa qatysýdy jón kórdik», – dedi Áskeri-áýe kúshteriniń qolbasshysy polkovnik Nurbolat Topaev.
Áýe qorǵanysy kúshteri Qazaqstannyń áýe keńistiginiń qaýipsizdigin kúzetýde. Aviatsiia parki jyl saiyn tehnika men qarý-jaraqtyń zamanaýi úlgilerimen tolyqtyrylyp otyr. Kásibi sheberliktikterin shyńdaý úshin jeke quramǵa qolaily jaǵdailar jasalýda.
