QR Qarýly Kúshteri Áskeri politsiia bas basqarmasynyń komandasy biyl Serbiiada ótetin «Tártip saqshysy» baiqaýyna daiyndyqqa kiristi, dep habarlaidy "Ult aqparat".
QR Qorǵanys ministrliginen málim etkendei, daiyndyq «Spassk» oqý-jattyǵý poligonynda ótýde. Komanda quramy 6 adamnan turady. Oǵan dene jáne atys daiarlyǵynan joǵary kórsetkishterimen erekshelengen áskeri politsiia qyzmetkerleri engen.
«Tártip saqshysy» baiqaýy tórt kezeńnen turady. Birinshi kezeńde áskeri qyzmetshiler avtomat pen pistoletten atýdan jaryssa, ekinshide juptasyp patrýl júrgizý mashyqtaryn kórsetedi. Olar turǵyndary bar aýyldarda shartty qarsylasqa atyspen shabýyl jasap saiysady. Úshinshi «Patrýldi nariad» kezeńinde atys, meditsinalyq daiyndyq, radiatsiialyq, himiialyq, biologiialyq qorǵanys jáne granatany dáldep laqtyrý normativterin oryndaidy. Oǵan ekstermaldy elementter arqyly patrýldik avtokólikti júrgize otyryp, quqyq buzýshynyń shabýylyn toitarý, ustaý kiredi.
«Eń qiyny jáne sońǵy sheshýshi kezeń – «Júgirý» kezeńi. Munda uzyndyǵy 12 shaqyrymǵa sozylǵan tas joldaǵy tabiǵi jáne jasandy kedergilerdi eńserý qajet», – dedi komanda jattyqtyrýshysy polkovnik Vitalii Fedorov.
Alǵash ret «Tártip saqshysy» baiqaýy 2017 jyly Armiia halyqaralyq oiyndary aiasynda ótkizilip, bizdiń komanda ekinshi oryn alǵan bolatyn.
