Qarýly kúshter quramynda áskeri- patriottyq jumysty júieli túrde nyǵaitý mańyzdy bolyp tur. Bul týraly Májilis depýtaty Erlan Sairov aitty, dep habarlaidy QazAqparat.
«Bizdiń Qarýly kúshterde eki problema bar, iaǵni qatardaǵy jaýyngerlerdiń zábir kórýi, áskerdiń el aldynda bedeliniń tómendeýi baiqalyp otyr. Bul - memleketti qorǵaý salasyndaǵy júieli problema. Azamattar, ásker ókilderi bul máseleni birigip sheshýi qajet. Elimizdegi áskeri-patriottyq tárbieni qaita qaraý óte mańyzdy. Áskeri-patriottyq tárbie barysynda Otan qorǵaý missiiasyna pozitivti emotsionaldyq, kúsh-jigerlik sezim, Otan qorǵaýdyń mańyzy jóninde jas jetkinshekterge tereń aqparat berý kerek», - dedi E. Sairov Úkimet basshysynyń orynbasary Eraly Toǵjanovtyń atyna joldaǵan saýalynda.
Osy oraida depýtat «AMANAT» fraktsiiasynyń tiisti usynystaryn jariialady.
«Kóptegen ǵalymdar «Qobylandy batyr», «Alpamys batyr», «Qambar batyr», «Er Tarǵyn» siiaqty batyrlar jyrynda el táýelsizdigin syrtqy jaýlardan qorǵaý saryny ústem dep atap ótedi. Balalyq shaqtan batyrlar jyryn, patriottyq sezimdi ardaqtap, batyrlyqty madaqtaǵan, aqyldylyq, parasattylyq, dostyq tárizdi adamgershilik igi qasietterdi dáripteitin mektepke deiin, mektep kezeńindegi baǵdarlama qajet», - dedi ol.
Sonymen qatar Sairov memlekettik til uttyq órleýdiń ajyramas bóligi ekendigi jónindegi uǵym mektepke deiin, mektep baǵdarlamasynyń ózegi bolýy tiis ekenin atap ótti.
«Beibit kúndegi qatal tártipke qazirgi tehnologiia zamanyndaǵy jas býynnyń boiy úirenbei jatyr. Sondyqtan áskeri patriotikaǵa jańa motivatsiianyń tásilin oilastyrý kerek. Qarýly kúshter quramynda áskeri - patriottyq jumysty júieli túrde nyǵaityp, jańa tehnologiialar eńgizý qajet. Áskeri oqý oryndarynda temirdei tártippen qatar, adamgershilik, baýyrmaldyq kýrstaryn uiymdastyrý mańyzdy. Adamnyń taǵdyryn tikelei sheshetin komandirler joǵary moraldyq-psihologiialyq dárejege ie bolýy tiis», - dedi depýtat.
