Qazaqstan Qarýly Kúshteriniń Bas áskeri-meditsinalyq basqarmasy áskeri meditsinany damytý baǵdarlamasyn ázirledi, dep habarlaidy QazAqparat Qorǵanys ministrliginiń baspasóz qyzmetine silteme jasap.
Baǵdarlama Qazaqstannyń áskeri meditsinasynyń birqatar mańyzdy baǵyttaryn qamtidy. Atap aitqanda, áskeri-meditsinalyq qamtamasyz etýdi basqarý, kadrlyq resýrstar, materialdyq baza jáne uiymdyq-shtattyq qurylym, sondai-aq meditsinalyq kómek kórsetýdi uiymdastyrý. Bul rette qazirgi jaǵdai, problemalyq máseleler jáne olardy sheshý joldary egjei-tegjeili kórsetilgen.
Bas áskeri-meditsinalyq basqarma bastyǵy polkovnik Timýr Oshaqbaevtyń aitýynsha, atalmysh baǵdarlamany júzege asyrý Qazaqstanǵa beibit jáne basqa da ýaqytta mindetterdi óz betinshe sheshýge qabiletti, meditsinalyq qamtamasyz etý men saqtandyrýdyń jalpy júiesinde básekege qabiletti áskeri-meditsinalyq bólimsheler men mekemeler qurýǵa múmkindik beredi.
Baiandamada aitylǵandai, josparlanyp otyrǵan basty nátijeler – áskerlerdi sapaly, zamanaýi meditsinalyq múlikpen jáne tehnikamen úzdiksiz qamtamasyz etý, áskeri dárigerdiń mártebesin jáne áskeri meditsinanyń bedelin arttyrý bolyp tabylady. Bul sharalardyń barlyǵy atalmysh qurylym men meditsinalyq qyzmet júiesin jaqsartýǵa múmkindik beredi.
«Baǵdarlamanyń mańyzdy aspektisi sanatoriialyq uiymdardyń klimatogeografiialyq ornalasýy boiynsha oryndardy bóle otyryp, sanatoriialyq-kýrorttyq emdeýge sáikes qyzmetterdi satyp alý bolyp tabylady. Qyzmetti qazirgi áskeri qyzmetshiler men zapastaǵy adamdar paidalana alady» delingen habarlamada.
Sondai-aq, qazaqstandyq áskeri qyzmetshilerdiń BUU bitimgershilik missiialaryna qatysýyn keńeitý sheńberinde áskeri-dalalyq gospitaldi daiyndaý jáne ony jiberý josparlanyp otyr.
Búginde Qazaqstannyń Qarýly Kúshterinde 21 áskeri-meditsinalyq mekeme jumys isteidi. Atap aitqanda, ortalyqtar, gospitaldar, lazaretter jáne 131 meditsinalyq bólimshe-meditsinalyq rotalar, pýnktter, vzvodtar, bólimsheler. Áskeri medikterdiń negizgi bóligi zapastaǵy ofitserlerdi jáne shet memleketterdiń áskeri oqý oryndarynyń túlekterin shaqyratyn Qazaqstannyń meditsinalyq joǵary oqý oryndarynan quralady. Qosymsha bilim berýdi QR QM áskeri meditsina ortalyǵy qamtamasyz etedi. Jyl saiyn 400-ge deiin adam bilim alady.
Áskeri meditsina júiesin damytý men jetildirý - áskerdiń joǵary jaýyngerlik daiarlyǵyn qoldaý jónindegi sharalar kesheninde basym baǵyttardyń biri jáne memlekettiń qorǵanys qabiletine tikelei áser etedi.
