Tatýlyq, birlik – bizdiń basty bailyǵymyz. Qazaqstan halqynyń birligi kúnine orai QR Ulttyq ulany «Batys» óńirlik qolbasshylyǵyna qarasty 5517-áskeri bóliminiń tárbie jáne áleýmettik-quqyqtyq jumys bóliminiń aǵa ofitseri, maior Roman Abdrahmanov oi-tolǵamyn osylai bildirdi, dep habarlaidy QazAqparat.
Onyń aitýynsha, ulty – tatar, ózin Qazaq eliniń patrioty dep esepteidi.
«Sebebi bizdiń ortaq úiimiz – biyl táýelsizdik alǵanyna 30 jyl tolatyn Qazaqstan. Elimizdegi qol jetken barsha tolaǵai tabys osy halyqtar dostyǵymen tyǵyz bailanysty. Sheteldikter bizdi aýyzbirshiligi mol, yntymaǵy jarasqan el dep biledi. Bul, rasynda da, solai. Osy birliktiń arqasynda elimiz damyp keledi. Osy tatýlyqtyń arqasynda Qazaqstan kúlli álem qyzyǵa qaraityn dáýletti de sáýletti memleketke ainaldy», - deidi Roman.
Sózine qaraǵanda, osydan on jyl buryn qazaq qyzy Áliiaǵa úilenip, otbasyn qurǵan eken. Ol da áskeri qyzmetshi. Oǵan qosa eki balanyń tárbiesimen ainalysady. Otbasynda tatar jáne qazaq halqynyń salt-dástúri men ádet-ǵurpy qatar saqtalady.
«Áskerde qyzmet etken 15 jyldan astam ýaqyt ishinde ár túrli laýazymdarda qyzmet atqardym jáne kez kelgen ujymda jaqsy qarym-qatynas, ózara qoldaý men qurmet, ádeptilik bolǵanyn atap ótkim keledi. Ulttyq ulannyń «Batys» óńirlik qolbasshylyǵynyń áskeri bólimderinde 15 ult ókili Otan aldyndaǵy boryshtaryn abyroimen atqaryp júr eken. Solardyń qatarynda keiingi jastarǵa úlgi bolyp, elimizdiń qorǵanysy odan saiyn nyǵaiyp, damýyna laiyqty úles qosa bilsek, odan úlken arman joq. Árdaiym uiymshyl da tártibi men birligi bekem áskeri ujymymyzben maqtana berýge jazsyn. Eń bastysy, elimizde beibitshilik pen kelisim saltanat qura bersin!» dedi Roman Abdrahmanov.
