Áleýmettik jelide áskeri komissariat qyzmetkeriniń keipine enip, kóshedegi jas jigitti qorqytqan bloger ákimshilik jaýapkershilikke tartyldy, dep habarlaidy ult.kz.
Jelide taraǵan videoda politsiiaǵa uqsas arnaiy kiim kigen er adam oryndyqta otyrǵan jigittiń janyna kelip, ony qorqytady. Ózin áskeri komissariat qyzmetkerleri izdep júr dep oilaǵan jas jigit oqiǵa ornynan qashyp, qýǵynnan qutylmaq bolyp ózenge sekirgen. Videodaǵy róldi bloger Birjan Áýbákirov somdaǵan.
Oqiǵaǵa bailanysty Baiqońyr aýdanynyń politsiia basqarmasy tekserý júrgizip, videodaǵy azamattyń jeke basyn anyqtady.
– Atalǵan derek boiynsha quqyq buzýshyǵa qatysty usaq buzaqylyq faktisi boiynsha ákimshilik hattama toltyryldy. Sondai-aq azamattardyń ómiri men qaýipsizdigine qater tóndirý jáne arnaiy nysandy aiyrym belgileri bar kiimdi zańsyz kiiý derekteri de eskerildi, – dep habarlady politsiia.
Quqyq buzýshy ýaqytsha ustaý izoliatoryna qamalyp, is materialdary ákimshilik sottyń qaraýyna joldandy.
Eske salaiyq, buǵan deiin Qazaqstanda adamdardy kelisiminsiz foto jáne videoǵa túsirýge, sondai-aq prank uiymdastyrýǵa qatysty jaýapkershilikti kúsheitý týraly usynystar aitylǵan bolatyn. Sońǵy ýaqytta mundai «ázilderdiń» birqatary qoǵamda qyzý talqylanyp, quqyqtyq saldarǵa ákelip jatyr.
