Semei qalasynda áýe shabýylyna qarsy qorǵanys bóliminde ofitser óli kúiinde tabyldy. Bes balanyń ákesi oq jaraqatynan qaza boldy, dep habarlaidy Sputnik Qazaqstan agenttigi Otyrar.kz portalyna silteme jasap.
Resmi málimetke sáikes, ofitser Baqytjan Áripjanov óz-ózine qol salǵan. Oq basyna tigen. Alaida týǵan-týystary bes balanyń ákesi ondaiǵa barmaidy dep otyr.
"Onyń bir problemalary bolǵan. Shymkentke aýysamyn dep júrgen. Biraq úlgere almai qaldy", - deidi marqumnyń ákesi Kúlibek Áripjanov.
Baqytjan áskeri salada 10 jyldan astam ýaqyt qyzmet etti. Qatardaǵy jaýyngerden kapitanǵa deiin jetti. Basynda Túrkistan oblysynda qyzmet atqardy. Odan keiin Semeige aýysyp barǵan. Shymkent qalasyna aýysamyn dep júrgende qaitys boldy.
Sol kúni ofitser bir saǵat buryn apasyna telefon shalǵan. Úsh jasar qyzymen amandasyp, artynan habarlasamyn dep, telefondy qoia salǵan. Odan keiin esh emotsiiasy joq birtúrli habarlama jibergen. Sosyn áieline "Qoshtaspaiyqshy!" ánin joldaǵan.
Týǵan-týystary munyń bári ádeii jasalǵan bolýy múmkin dep oilaidy. Al áskeri bólimniń qyzmetkerleri Baqytjannyń kezekshiden tapansha alyp, basyna oq atqanyn aityp otyr.
"Ofitser qaza boldy. Qazir qylmystyq is qozǵaldy. Tekseris júrip jatyr. Sondyqtan basqa eshteńe aita almaimyn", - deidi 31767 áskeri bólimniń komandiri Aibol Ótegenov.
Marqumnyń týystary qosymsha táýelsiz sot-meditsinalyq saraptama ótkizýdi jáne barlyq mán-jaidy jan-jaqty tergeýdi talap etip otyr.
