© Sputnik / Timýr Batyrshin
Ǵylym jáne joǵary bilim ministri Saiasat Nurbek merzimdi áskeri qyzmetin ótep kelgenderge joǵary bilim alýǵa jeńildik jasaý jobasyn túsindirdi, dep habarlaidy Sputnik Qazaqstan.
Buǵan deiin Qorǵanys ministrligi jańa jobanyń aiasynda merzimdi áskeri qyzmetin ótep kelgender joǵary oqý ornyna tegin túse alatynyn málimdegen bolatyn. Negizgi maqsaty – jastardyń merzimdi áskeri qyzmetin óteýge degen yntasyn arttyrý. Áskerge baryp kelgenderge birneshe jeńildik jasalady. Olar:
- UBT-ny esepke almai, áńgimelesý nátijesi boiynsha eki jyl ishinde aqyly negizde joǵary oqý ornyna túsý;
- JOO áskeri kafedrasynda tegin oqý;
- merzimdi áskeri qyzmetti óteý kezindegi jetistikterine qarai joǵary oqý orny grantyn berý;
- áskeri oqý oryndaryna emtihansyz jáne UBT-syz oqýǵa túsý.
Ǵylym jáne joǵary bilim ministri Saiasat Nurbek mundai bastamanyń usynys retinde túskenin rastady.
"Iá, qorǵanys ministrligi bizge osyndai usynys aitty. Bul jerde eskeretin eki jáit bar. Birinshiden, grantty zańdy túrde UBT-nyń nátijesi boiynsha ǵana bere alamyz. Ekinshiden, bul bastama qorǵanys ministrligi men ýniversitter arasynda kelisimmen jasalady. Biz qarsy emespiz. Shynymen de, jastardy áskeri qyzmetke yntalandyrý tetikteri bolýy qajet. Ókinishke qarai, jastardyń kóbisi áskerge barmaidy", - dedi Nurbek ortalyq kommýnikatsiialar qyzmetinde ótken brifingte.
Onyń aitýynsha, búginde Izrail, AQSh, Eýropa, tipti, jaqyn kórshimiz – Ózbekstanda ondai tetikter bar.
"Grant emes, ýniversitettiń ózinen jeńildikter beriledi, ia bolmasa, aqyly túrde oqýdy jalǵastyrýǵa múmkindik jasalady. Al granttar tek UBT-nyń nátijesi boiynsha úlestiriledi", - dep túiindedi ministr.
