Foto: Habar24
Aqmola oblysynda áskeri qyzmetten bosatýǵa ýáde berip, aqsha alǵan aýdandyq emhana dárigeri sottaldy. Bul týraly oblystyq sot habarlady.
Is Tselinograd aýdandyq sotynda qaralǵan. Dárigerge qyzmettik jaǵdaiyn paidalana otyryp alaiaqtyq jasady degen aiyp taǵylǵan.
Tergeý derekterine sáikes, ol 2024 jyldyń qazan–jeltoqsan ailary aralyǵynda úsh azamatqa áskeri qyzmetti keiinge qaldyryp berýge ýáde etip, árqaisysynan 350 myń teńgeden alǵan.
Alaida alynǵan qarajat jeke maqsatqa jumsalyp, jábirlenýshilerge materialdyq shyǵyn keltirilgen.
Sot úkimimen dáriger 3 jyl 6 aiǵa bas bostandyǵyn shekteý jazasyna kesildi. Sondai-aq ol 1 jyl boiy meditsinalyq qyzmetpen ainalysý quqyǵynan aiyryldy.
