QR Tsifrlyq damý, innovatsiia jáne aeroǵarysh ónerkásibi ministri Asqar Jumaǵaliev Elektrondy úkimet portaly týraly túsinik berdi, dep habarlaidy "Ult aqparat".
«Ózderińiz bilesizder, elimizde tótenshe jaǵdai jarialandy. Bul kúnderi meniń áriptesterim barlyq resýrstardy iske qosyp, múmkindiginshe jumys isteýde. Osy múmkindikti paidalana otyryp, olarǵa zor alǵys bildiremin. Elektrondy úkimettiń jumys isteý múmkinshiligine toqtalsaq, halyqqa qyzmet kórsetý ortalyqtary jabylǵannan keiin, portal shtattyq rejimde jumys istedi. Tótenshe jaǵdaiǵa bailanysty portaldy paidalanýshylar sany birden kóbeidi. Osyǵan qaramastan portal shtattyq rejimde jumysyn jalǵastyrdy», - dedi ministr «Habar 24» telearnasynyń tikelei efirinen.
Onyń sózine qaraǵanda, TJ kezeńinde millionnan astam elektrondy qyzmet kórsetildi.
«Kúndelikti rejimde portalda saǵatyna 600 myń ótinim túsetin. Qazir eń joǵary shektegi júkteme kezinde saǵatyna 15 millionǵa deiin jetip otyr. Bul óz kezeginde eleýli júkteme», - dedi A. Jumaǵaliev.
Budan bólek ministr tótenshe jaǵdai kezinde áleýmettik tólemge ótinim berýde keibir qiyndyqtarǵa bailanysty bolǵan eskertýlerge pikir bildirdi.
A. Jumaǵalievtiń aitýynsha, 42 500 teńgeniń tólemi boiynsha qyzmetti engizýge qatysty reglament 28 naýryzda bekitildi. Osy oraida IT-mamandarǵa bul reglament jetkizildi.
«Biz túni boiy jumys istep, atalǵan qyzmetti iske qostyq. Osydan keiin áleýmettik tólemdi usynýǵa qatysty tiisti qyzmetti iske asyrýdy bastadyq. Portalda bir mezgilde 15 millionǵa deiingi sessiia tirkeldi. Bul kórsetkish barlyq shtattyq rejimderden asyp tústi. Árine, bul turǵyda belgili bir máseleler týyndap, biz problemalardy sheshý maqsatynda syrtqy kanaldardy ajyrattyq», - dedi vedomstvo basshysy.
Budan buryn habarlanǵandai, 42 500 teńgelik áleýmettik tólem 3 millionǵa jýyq adamǵa beriledi.
Sonymen qatar, Eńbek jáne halyqty áleýmettik qorǵaý ministri Birjan Nurymbetov sáýirde elimizde 42 500 teńgelik tólemdi alýǵa bolatyn arnaiy saittyń ashylatynyn málimdedi.
