QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev qaýipsizdik sertifikatynyń múmkindikterin túsindirdi, dep habarlaidy QazAqparat.
Baspasóz máslihaty barysynda ministr tilshiler qaýymyna atalǵan sertifikatty smartfonyna ornatqanyn kórsetti.
«Maǵan tiisti SMS kelgennen keiin, eshbir qiyndyqsyz sertifikatty ornattym. Búginde internette quqyqqa qaishy kontent kóptep kezdesedi, sondai-aq kiberlik qaterler de bar. Osy oraida tiisti qorǵanysty qamtamasyz etý úshin atalǵan qaýipsizdik sertifikaty iske qosylady» - dedi A. Jumaǵaliev.
Osy oraida ol quqyqqa qaishy kontentke sýitsidti nasihattaý, ekstremistik ári lańkestik sipattaǵy aqparattar jáne basqa da teris mándegi derekter jatatynyn túsindirdi.
«Búginde internette jumys isteýge kedergi keltiretin virýstar bar. Bul turǵyda qaýipsizdik sertifikaty osy tektes kiber tosqaýyldar men qaterlerden qorǵanýǵa kómektesedi», - dedi vedomstvo basshysy.
Onyń sózine qaraǵanda, memlekettik qyzmetshiler osy sertifikatty bir jarym jyldan beri paidalanyp keledi.
«Tek sońǵy aida atalǵan sertifikat 8 millionnan astam virýstyq belsendiliktiń aktilerin anyqtaýǵa, memorgandar men memlekettik qyzmetshiler jumysyna qarsy baǵyttalǵan 130 myń kiber shabýyldan qorǵaýǵa múmkindik berdi. Memlekettik qyzmetshiler retinde qaýipsizdik sertifikaty aiasynda tiisti jumystardy jalǵastyramyz. El turǵyndary óz erkimen atalǵan sertifikatty ornatady», - dedi ministr.
Budan buryn habarlanǵandai, operatorlar atalmysh silteme eldegi barlyq abonentterge taratylyp jatqanyn aitady.
Iaǵni, ázirge ondai SMS almaǵan adamdardyń alańdaýyna sebep joq. Silteme kelgen sátti kútip, ornatýǵa daiyn bolýy kerek. Mamandardyń aitýynsha, abonenttiń hakerlik shabýylǵa ushyraýy úshin kúmándi siltemege ótýi mindetti emes. Iaǵni qaýipsizdik júiesiniń sertifikaty bolmaǵan jaǵdaida internet arqyly paidalanatyn kóptegen qyzmetterge kiretin qupiia sózder men kodtardy urlaý ońai. Qaýipsizdik júiesiniń sertifikatyn ornatý osy úshin qajet.
