QR Premer-Ministriniń birinshi orynbasary Asqar Mamin bastaǵan jumys toby oblys ortalyǵynda atqarylyp jatqan qurylys jumystarymen tanysqan soń Túrkistan qalasyn damytýǵa arnalǵan jiynǵa qatysty, dep habarlaidy óńir basshysynyń baspasóz qyzmeti.
Keleli jiynǵa QR Mádeniet jáne sport ministri A.Muhamediuly, QR Qoǵamdyq damý ministri D.Qaletaev, QR Enegetika ministriniń orynbasary M.Myrzaǵaliev ózge de ministrlik ókilderi men ulttyq kompaniia basshylary, Túrkistan oblysynyń ákimi J.Túimebaev jáne ózge de oblys basshylyqtary qatysty.
Jiynda alǵashqy bolyp oblys ákimi Janseiit Túimebaev aldaǵy ýaqytta júzege asyrylatyn jobalar jóninde tanystyrdy.
«Elbasynyń tapsyrmasyna sáikes, Túrkistan qalasyn damytý jónindegi josparyn iske asyrýǵa ózge oblystardan bólek Ulttyq kompaniialar men biznes ókilderi atsalysatyn bolady. Búginde qurylys jumystarymen ainalysatyn merdigerlerge qatysty qujattar ázirlenip, tiisti sharalar atqarylýda. Iaǵni, jańadan salynatyn nysandarǵa arnalǵan jer telimderi zerttelip, daiyndalýda. Sondai-aq, injenerlik kommýnikatsiialar úshin tehnikalyq sipattamalar jasalyp, sáýlettik josparlaý jumystary júrgizildi», - dedi Janseiit Qanseiituly.
Sondai-aq, basqosýda Túrkistan qalasynyń ózge de salalaryn damytý boiynsha birqatar ministrler men ministrlik ókilderi aldaǵy jumys josparlary jóninde baiandama jasady. Atap aitqanda, QR Mádeniet jáne sport ministri A.Muhamediuly Áziret Sultan kesenesiniń ainalasyn jańǵyrtýǵa baǵyttalǵan jobalarmen tanystyrdy. «Astanagenplan» JShS direktory S.Júnisov Túrkistan qalasyndaǵy jańa ákimshilik-iskerlik ortalyqtyń nobaiyn kórsetti. Al «BI Group» JShS ókili A.Zikirin ákimshilik-iskerlik ortalyqta boi kóteretin turǵyn úi kesheni men Uly dala mýzeii, Týristik ortalyq, Shyǵys monshasy, Amfiteatr, Qoja Ahmet Iasaýi mýzeii, Oqýshylar saraiy, Oblystyq ǵylymi-ámbebap kitaphanasy, Media ortalyq, «Astana» alańy, Ortalyq stadion syndy ǵimarattardyń jobasymen tanystyrdy.
Jiyndy qorytyndylaǵan QR Premer-Ministriniń birinshi orynbasary Asqar Mamin isti jospardan keshiktirmei der kezinde oryndaýdy tapsyrdy.
