QR Premer-Ministri Asqar Mamin Soltústik Qazaqstan oblysyna jumys sapary aiasynda investitsiialyq jobalardyń iske asyrylýyn tekserip, óńirdiń odan ári áleýmettik-ekonomikalyq damýy jóninde keńes ótkizdi, – dep habarlandy Úkimet basshysynyń resmi saitynda.
Petropavl qalasynda Asqar Mamin «Qyzyljar» AEA aýmaǵynda elektr tehnikalyq ónimin óndiretin jańa zaýyttyń qurylys barysymen tanysty. Joba quny – 10 mlrd teńge. Kásiporynnyń qýattylyǵy 300 jańa jumys ornyn qurýmen jylyna 13 myń transformatordy quraidy.
Úkimet basshysy «Petropavl aýyr mashina jasaý zaýytyna» bardy, onyń aýmaǵynda tez buzylatyn azyq-túlik ónimderin tasymaldaýǵa arnalǵan termos vagondardy qurastyratyn jańa óndiris orny ashylǵan. Jobalyq qýattylyǵy – 200 adamdy jumyspen qamti otyryp, jylyna 1200 vagon. Premer-Ministr «Soltústik fanera kombinaty» JShS laminattalǵan fanera óndiretin zaýyttyń jumysymen tanysty. Kásiporyn 150 adamdy jumyspen qamtyp otyr. Jobalyq qýattylyǵy – jylyna 27 myń m³ ónim.
Sondai-aq Úkimet basshysy Petropavl qalasynyń «Shyǵys» shaǵynaýdanynda JCI halyqaralyq standarttary boiynsha 510 tósek- orynǵa arnalǵan kópbeiindi oblystyq aýrýhana qurylysynyń barysyn tekserdi. Jobany 2022 jyldyń sońyna qarai memlekettik-jekeshelik áriptestik aiasynda «YDA Holding» túrik investory júzege asyrady. Qyzyljar aýdanynyń Chapaevo aýylynda Premer-Ministr «Qyzyljar Sút» JShS-niń jańa tsifrlandyrylǵan sút-taýar fermasynda boldy. Fermanyń qýattylyǵy – jylyna 3,6 myń tonna sút.
Jumys saparynyń qorytyndysy boiynsha Premer-Ministr Soltústik Qazaqstan oblysynyń áleýmettik-ekonomikalyq damýy jáne aldaǵy kezeńge arnalǵan perspektivalary jóninde keńes ótkizdi. Óńir ákimi Qumar Aqsaqalov, aýyl sharýashylyǵy ministri Saparhan Omarov, indýstriia jáne infraqurylymdyq damý ministri Beibit Atamqulov, densaýlyq saqtaý ministri Aleksei Tsoi, eńbek jáne halyqty áleýmettik qorǵaý ministri Serik Shápkenov, bilim jáne ǵylym ministri Ashat Aimaǵambetov, ulttyq ekonomika vitse-ministri Ermek Alpysov jáne qarjy birinshi vitse-ministri Berik Sholpanqulov baiandama jasady.
«Soltústik Qazaqstan oblysy agroónerkásiptik keshende, óńdeý ónerkásibinde jáne basqa da salalarda úlken áleýetke ie. Óńirdiń odan ári áleýmettik-ekonomikalyq damýyna, onyń básekege qabilettiligin arttyrýǵa, halyqtyń turmys sapasy men ál-aýqatynyń joǵary bolýyn qamtamasyz etýge eleýli serpin berý qajet»,- dedi A. Mamin.
2020 jyldyń qorytyndysy boiynsha Soltústik Qazaqstan oblysynyń aýyl sharýashylyǵyndaǵy jalpy ónim kólemi 779 mlrd teńgeni qurady. Bul ótken jylǵydan 27%-ǵa joǵary, ónerkásiptik ónim óndirý kólemi – 306 mlrd teńge (+4,8%). Negizgi kapitalǵa salynǵan investitsiialar kólemi 20,5%-ǵa – 281 mlrd teńgege deiin ulǵaidy.
