QR Premer-Ministri Asqar Mamin jumys saparymen Pavlodar oblysyna bardy, dep habarlaidy primeminister.kz
QR Premer-Ministri Asqar Mamin Elbasy Nursultan Nazarbaev bastamashy bolǵan indýstriialyq-innovatsiialyq damý memlekettik baǵdarlamasynyń, sondai-aq, Memleket basshysy Qasym-Jomart Toqaevtyń Pavlodar oblysynyń ónerkásiptik áleýetin damytý jónindegi tapsyrmasynyń iske asyrylýyn baqylaý aiasynda óńirge jumys saparymen bardy.
Pavlodar qalasynda Úkimet basshysy elimizdegi birden bir metil-tret-býtil efir jáne polipropilen óndirisi – «Kompaniia Neftehim LTD» JShS-na, sondai-aq, «Qazaqtelekom» AQ-nyń derekterdi óńdeýge jáne saqtaýǵa arnalǵan serverlermen jabdyqtalǵan ozyq Derekterdi óńdeý ortalyǵyna (DÓO) bardy. Munda «Samuryq-Qazyna» UÁQ» AQ, «Qazatomónerkásip» UAK», «QazMunaiGaz» UK», «Qazposhta», «Sátti Juldyz» jáne «Google», «Wargaming», «Genesis Mining» halyqaralyq korporatsiialary elektrondy derekterin ornalastyryp, júielep, rezervke qoiady.
Premer-Ministr Pavlodar qalasyndaǵy densaýlyq saqtaý jáne sport nysandarynyń salyný barysymen tanysty, onyń ishinde biyl 1 jeltoqsanda paidalanýǵa berý kózdelgen 200 tósek-oryndyq oblystyq onkologiialyq dispanser men táýligine 100 kelýge arnalǵan emhana, sondai-aq, muz arenasyn, fýtbol jáne jabyq jeńil atletika manejderin, olimpiadalyq rezervke daiyndaý ortalyǵyn qamtityn «Sport-Siti» sport qalashyǵy bar.
«Investorlar úiinde» A. Maminge Pavlodar oblysyna investitsiialar tartý jumystary tanystyryldy. Munda kez kelgen biznesmen «bir tereze» qaǵidaty boiynsha qyzmetter men konsýltatsiialar ala alady — «Kazakh Invest», «Pavlodar» AEA» basqarýshy kompaniiasynyń, «Atameken» óńirlik kásipkerler palatasynyń, «QazAgroQarjy» AQ, «Agrarlyq nesie korporatsiiasy», «Aýyl sharýashylyǵyn qarjylai qoldaý qory» jáne «Damý» kásipkerlikti damytý qorynyń» keńseleri bir alańda jumys isteidi.
Úkimet basshysyna Ekibastuz qalasynyń indýstriialyq aimaǵynda qýattylyǵy jylyna 35 myń tonnany quraityn tehnikalyq kremnii óndirý zaýytynyń salyný barysy týraly baiandaldy, sondai-aq, sýarý úshin asa aýqymdy jabdyqtar shyǵaratyn zaýyt qurylysynyń jobasy tanystyryldy.
Aqsý qalasynda Premer-Ministr Kásipkerlikti qoldaý kartasy aiasynda óńirdegi biylǵy asa iri joba — «Eýraziialyq energetika korporatsiiasy» AQ Aqsý elektr stantsiiasynyń rekonstrýktsiialanǵan №5 energoblogymen tanysty, ony biyl jeltoqsan aiynda paidalanýǵa berý josparlanǵan.
A. Mamin Pavlodar oblysyndaǵy asa iri jáne júie quraýshy kásiporyndardyń biri — «Qazhrom» TUK» AQ filialy Aqsý ferroqorytpa zaýytyn aralap, onda balqytý peshteriniń renovatsiiasy barysymen tanysty, bul 2024 jylǵa qarai ferrohrom óndirisiniń kólemin 2018 jylǵy kórsetkishtermen salystyrǵanda 87%-ǵa arttyrýǵa múmkindik beredi. Bul oraida elektr energiiasyn tutyný 20%-ǵa tómendeidi.
Úkimet basshysy Aqsý qalasyndaǵy tirshilikti qamtamasyz etý jáne áleýmettik infraqurylym nysandaryn — salynyp jatqan qalalyq jylý qazandyǵy men balalar eko-tehno ortalyǵyn tekserdi.
Jyl basynan beri Pavlodar oblysynda ónerkásiptik ónim óndirisiniń kólemi 1,6 trln teńgeni qurady, bul ótken jylǵy kezeńnen 19 mlrd teńgege nemese 1,8%-ǵa artyq. Respýblikalyq óńdeý kóleminiń 12%-ǵa jýyǵyn qamtamasyz etip otyrǵan óńdeý sektorynyń kásiporyndary da turaqty ósim kórsetti. Munai óńdeý ónimderiniń óndirisi 3,1%-ǵa, metallýrgiia óndirisi 2,1%-ǵa, himiia óndirisi 8,9%-ǵa, mashina jasaý óndirisi 5,3%-ǵa ósýde.
