QR Premer-Ministri Asqar Mamin búgin Túrkistan oblysyna is-saparmen kelip, oblys ortalyǵynda salynyp jatqan birqatar qurylys nysandaryn aralady, – dep habarlaidy óńir basshysynyń baspasóz qyzmeti.
Úkimet basshysy Túrkistannyń irgesindegi Shaǵa aýylynda salynyp jatqan jańa áýejaidyń qurylys barysymen tanysyp, tikushaqpen baqylady. Biyl mamyr aiynda irgetasy qalanǵan áýejai keleshekte halyqaralyq jáne ishki reisterde saǵatyna 250 adam qabyldaýǵa qaýqarly bolmaq. Qurylys jumystaryn túrkiialyq «IDA INShAAT» kompaniiasy júrgizýde. Túrkistan qalasynan 16 shaqyrym qashyqtyqta ornalasqan áýejaidyń aýmaǵy 905,3 gektar aýmaqty alyp jatyr. Onda ushý-qoný jolaǵy jáne basqa da nysandar salynýda. Qurylys jumystaryna 420 adam tartylǵan halyqaralyq terminal 2020 jyldyń jeltoqsan aiynda paidalanýǵa beriledi dep kútilýde.
Premer-ministr, sondai-aq, halyqaralyq áýejaiǵa baratyn joldyń sapasymen de tanysyp kórdi. 16,3 shaqyrymǵa sozylyp jatqan joldyń qurylysy tamyz aiynda bastalǵan. Oblystyq jolaýshylar kóligi jáne avtomobil joldary basqarmasynyń tapsyrysymen salynyp jatqan joldyń qurylysy keler jyldyń jeltoqsanynda aiaqtalady dep kútilýde.
Asqar Mamin sapary barysynda Túrkistan qalasyndaǵy ákimshilik iskerlik ortalyǵynyń qurylys jumystary barysyn aralap kórdi. Jańadan boi kóterip jatqan nysandardyń qurylysymen tanysyp, jaýaptylarǵa jumystardy qarqyndatýdy tapsyrdy. Túrkistan turǵyndarynyń igiligine birshama ýaqyttan soń beriletin amfiteatr ǵimaratynyń qurylysy biyl sáýir aiynda bastalǵan bolatyn. Nysan tolyqtai salynyp bitip, taiaý kúnderi paidalanýǵa beriledi dep kútilýde. Mańǵystaý oblysy ákimdiginiń syiy retinde salynǵan nysan 1000 orynǵa laiyqtalǵan. Zamanaýi keshenniń jalpy kólemi 2400 sharshy metrdi quraidy. «Rýhani-mádeni ortalyq» aimaǵyndaǵy 0,56 gektar jerge júrgizilip jatqan qurylys alańynda 60 jumysshy eńbek etýde.
Úkimet basshysy munan keiin Aqtóbe óńiriniń tartýy retinde salynyp jatqan drama teatrdyń qurylys jumysymen tanysty. Atalǵan nysan Túrkistan men Aqtóbe oblystarynyń birigip qarjylandyrýymen júzege asýda. 4 qabattan turatyn ǵimarattyń jalpy kólemi 9700 sharshy metrdi quraidy. Boi kóterip kele jatqan mádeni oshaq zamanaýi úlgide, barlyq talaptarǵa sai salynýda. Ǵimaratta 510 adamǵa arnalǵan kórermen zaly, arnaiy avtoturaq orny bolady. Jańa drama teatrdyń qurylysy osy jyldyń maýsym aiynda bastalyp, 2020 jyldyń qazan aiynda aiaqtalady dep josparlanyp otyr.
