QR Premer-Ministri Asqar Mamin «Nur Otan» partiiasy Saiasi keńesiniń keńeitilgen otyrysynda táýelsizdik jyldaryndaǵy aishyqty oqiǵalarǵa toqtaldy, dep habarlaidy QazAqparat.
«1991 jyly álemdegi eń iri Semei iadrolyq synaq poligonyn jabý týraly uzaq kútken tarihi sheshim qabyldandy. Qazaqstan álemdik iadroǵa qarsy qozǵalystyń kóshbasshysyna ainaldy.
1992 jylǵy naýryzda Qazaqstan Birikken Ulttar Uiymynyń tolyqqandy múshesi boldy.
1993 jylǵy qarashada elimizdiń óziniń ulttyq valiýtasy – teńge engizildi. Dál sol jyly «Bolashaq» baǵdarlamasy iske qosyldy, onyń aiasynda shamamen 12 myń jastar sheteldi bilim alyp, elimizdiń igiligi úshin eńbek etip jatyr», - dedi Úkimet basshysy.
Onyń paiymynsha, Táýelsizdik jyldary qol jetkizilgen nátijeler eldiń áleýmettik-ekonomikalyq damýynyń eleýli kórsetkishterin qamtamasyz etýge múmkindik bergen.
«1995 jyly jańa Konstitýtsiia qabyldandy. 1997 jyly «Qazaqstan-2030» damý strategiiasy qabyldanyp, eldiń uzaq merzimdi perspektivadaǵy naqty damý baǵdaryn aiqyndady. Elbasynyń elordany kóshirý týraly tarihi jáne strategiialyq sheshimi búkil eldiń damýyna myqty áser etti.
Taǵy bir mańyzdy qadam 2000 jyly Ulttyq qordyń qurylýy boldy. Bul rezerv jinaqtap, eldiń syrtqy táýekelderge qarsy turýǵa múmkindik berdi.
2005 jyly Memlekettik shekaranyń zań júzinde rásimdeýdiń tolyq aiaqtalýy aitýly oqiǵa boldy.
2012 jyly «Qazaqstan – 2050» strategiiasynyń qabyldanýymen álemniń eń damyǵan 30 eliniń qataryna kirý týraly asqaq maqsat mejelendi», - dedi Premer- Ministr.
Sondai-aq, ol Eýraziialyq ekonomikalyq odaq Elbasynyń integratsiialyq protsesterdi damytý týraly bastamasy boiynsha qurylǵanyn eske saldy.
«2015 jyly Bes institýtsionaldyq reformany iske asyrý boiynsha «100 naqty qadam» Ult jospary bekitildi. Álemdik ekonomikaǵa integratsiianyń mańyzdy kezeńi - Qazaqstannyń sol jyly qarashada Dúniejúzilik saýda uiymyna kirýi boldy», -dep atap ótti Asqar Mamin.
.jpeg)