QR Premer-Ministri Asqar Mamin RF Astrahan oblysynyń gýbernatory Igor Babýshkin bastaǵan delegatsiiamen kezdesti, dep habarlaidy "Ult aqparat" primeminister.kz-ge silteme jasap.
Taraptar Qazaqstan Respýblikasy men Resei Federatsiiasy arasyndaǵy saýda-ekonomikalyq, investitsiialyq, ónerkásiptik, tranzittik-kólik, týristik, mádeni-gýmanitarlyq salalardaǵy shekara mańy yntymaqtastyǵynyń ózekti máselelerin talqylady.
Ózara saýda qarqynyn arttyrý úshin shekara mańy saýdasy ortalyǵyn qurý perspektivalary talqylandy.
Biyl QR men RF arasyndaǵy ózara saýda dinamikasy belsendi qalpyna keltirilýde. 2021 jylǵy qańtar-mamyrda taýar ainalymy 26,2%-ǵa ósip, $8,6 mlrd qurady. Qazaqstannyń Reseige eksporty 40%-dan astamǵa ulǵaidy. Birinshi kezektegi mindet – taýar ainalymynyń kórsetkishterin 2019 jylǵy deńgeige qaraǵanda $20 mlrd deiin jetkizý.
Shekara mańyndaǵy saýdanyń Qazaqstannyń Reseimen ózara saýdasynda úlesi zor, osyǵan bailanysty taraptar ony odan ári damytý úshin sharalar belgiledi.
Astrahan oblysynyń keme jasaý kásiporyndarynyń tájiribesin eskere otyryp, A. Mamin ónerkásiptik kooperatsiia jobalaryn damytý perspektivasymen keme jasaý salasyndaǵy yntymaqtastyqty keńeitý múmkindigin atap ótti.
Shekara mańy bailanystaryn damytýdaǵy perspektivaly baǵyt týrizm salasyndaǵy yntymaqtastyq bolyp otyr. Aqtaý jáne Astrahan qalalary arasynda Kaspii teńizi boiynsha teńiz krýizin iske qosý múmkindigi qarastyryldy. Bul shekara mańyndaǵy óńirlerdiń saýda-ekonomikalyq áleýetin damytýǵa da yqpal etetin bolady.
