QR Premer-Ministri Asqar Mamin Eýropa qaita qurý jáne damý bankiniń Direktorlar keńesiniń múshelerimen kezdesti, dep habarlaidy primeminister.kz.
QR Premer-Ministri Asqar Mamin Eýropa qaita qurý jáne damý bankiniń (EQQDB) Direktorlar keńesiniń múshelerimen Qazaqstan aýmaǵynda birlesken investitsiialyq jobalardy iske asyrýdyń keleshegi men qazirgi jaǵdaiyn talqylady.
Úkimet basshysy Qazaqstannyń Tuńǵysh Prezidenti – Elbasy Nursultan Nazarbaev pen Memleket basshysy Qasym-Jomart Toqaev EQQDB qosa alǵanda, jetekshi halyqaralyq qarjy institýttarymen ornatylǵan yntymaqtastyqqa úlken kóńil bóletinderin atap ótti.
Sońǵy 27 jylda EQQDB-nyń Qazaqstanǵa salǵan investitsiialarynyń kólemi 260 jobadan astam – $9 mlrd-tan astamdy quraǵan, olardyń ishinde 2018 jáne 2019 jyldary 43-i boiynsha ýaǵdalastyqtarǵa qol jetkizildi.
«Biz turaqty jeke sektor negizinde ekonomikalyq ósim modelin qurýǵa umtylamyz. 2019 jyldyń 8 aiynda Qazaqstan ekonomikasynyń ósimi 4,3% qurady. Bizdiń strategiialyq maqsatymyz – JIÓ 5% jyl saiynǵy ósimine qol jetkizý. Ol úshin bizge jyl saiyn tartylatyn investitsiialar kólemin 2018 jylǵy $24 mlrd-tan 2025 jylǵa qarai $34 mlrd-tan astamǵa arttyrý mańyzdy», — dedi A. Mamin.
QR Premer-Ministri EQQDB Direktorlar keńesiniń múshelerin energetika, «jasyl ekonomika», turǵyn-úi kommýnaldyq sharýashylyǵy, shaǵyn jáne orta biznesti damytý, kólik jáne qarjy sektorlary, infraqurylym qurylysy salalaryndaǵy jobalardy iske asyrýǵa belsendi qatysýdy jalǵastyrýǵa shaqyrdy.
Asqar Mamin EQQDB ókilderiniń nazaryn Qazaqstanda memlekettik-jekeshelik áriptestik salasynda asa iri jobany — Úlken Almaty ainalma avtokólik jolynyń qurylysyn iske asyrýda yntymaqtastyqty odan ári tereńdetýdiń mańyzdylyǵyna aýdartty, bul Qazaqstannyń tranzittik áleýetin arttyryp qana qoimai, Almaty qalasy men Almaty oblysynda ekologiialyq ahýaldyń jaqsarýyna yqpalyn tigizetin bolady.
Úkimet basshysy men ministrler investitsiialyq ahýaldy jetildirý sharalary, ekonomika jáne adamdardyń ál-aýqaty turǵysynan eldiń negizgi strategiialyq basymdyqtary týraly aityp berdi jáne EQQDB Direktorlar keńesiniń músheleriniń qyzyǵýshylyq tanytqan suraqtaryna jaýap berdi.
