Elimizde óz biznesin ashqan adamdardyń sanyn arttyrý qajet. Bul týraly búgin «Biznestiń jol kartasy-2020» memlekettik baǵdarlamasynyń iske asyrylý barysy qaralǵan Úkimet otyrysynda QR Premer-Ministri Asqar Mamin aitty, dep habarlaidy QazAqparat tilshisi.
«Ákimdikter osy baǵdarlamanyń («Biznestiń jol kartasy-2020» memlekettik baǵdarlamasy-avt) damýyna serpin berý úshin shaǵyn jáne orta biznes jobalaryna sýbsdiia men kepildik berý, qosymsha qarajat bólý máselesin qarastyrý kerek», - dedi ol.
Osy rette Premer-Ministr úlgi alarlyq mysaldar bar ekendigin atap ótti.
«Shymkent qalasynyń ákimdigi sýbsidiialaýǵa 600 mln teńge, al jobalarǵa kepildik berýge 250 mln teńge, Atyraý oblysynyń ákimdigi 600 mln teńge bóldi», - dedi Úkimet basshysy.
Asqar Mamin «Atameken» ulttyq kásipkerler palatasy biznes mektepterdegi oqytýdyń tiimdiligin arttyryp, óz biznesin ashqan adamdar sanyn ósirýi qajettigine de nazar aýdartty.
«Elbasy óz Joldaýynda Úkimetke qysqa merzimde «Biznestiń jol kartasy-2020» baǵdarlamasynyń 2020-2025 jylǵa deiingi kelesi kezeńin ázirlep, bekitýdi tapsyrdy», - degen Premer-Ministr bul baǵyttaǵy jumysty birinshi orynbasary Álihan Smaiylovqa jiti baqylaýǵa alýdy tapsyrdy.
