Qazaqstanda jeke investitsiialar qory qurylady. Bul týraly búgin elordada ótip jatqan qazaqstandyq-amerikalyq biznes forým barysynda QR Premer-Ministriniń birinshi orynbasary Asqar Mamin aitty, dep habarlaidy QazAqparat tilshisi.
«Quny 1 mlrd dollardy quraityn Jeke investitsiialar qoryn ashýdy josparlap otyrmyz. Shikizattyq sektordaǵy jobalarymyzdy keńeitpekpiz. Sonymen qatar, AQSh-taǵy seriktesterimizdi qordy qarjylandyrýǵa jáne basqarýǵa shaqyramyz. Biznes-ahýaldy jaqsartý úshin jeke sektordy ekonomikaǵa tartyp otyrmyz. Iri kompaniialarymyz memlekettik-jekeshelik áriptestik ustanymynyń arqasynda jekeshelendiriledi. Búginde biz memlekettik-jekeshelik áriptestik aiasyndaǵy jobalardy tabysty júzege asyrýdamyz. Sondyqtan amerikalyq seriktesterdi atalǵan jobalar men baǵdarlamalarǵa qatysýǵa shaqyramyn», - dedi Úkimet basshysynyń birinshi orynbasary.
Sonymen qatar, ol Qazaqstanda investorlar úshin qolaily saýda-sattyq jaǵdaiy jasalyp jatqanyn jáne bul ekonomikalyq saiasattyń basymdyǵy sanalatynyn basa aitty.
«Prezident Nursultan Nazarbaev basym bóligin sheteldik kompaniialardyń ókilderi quraityn Shetel investorlary keńesiniń jumysyna jeke ózi jaýap beredi. 2017 jyldyń shildesinde ashylǵan Astana halyqaralyq qarjy ortalyǵy aldyńǵy qatarly tehnologiialarǵa arqa súieidi. Bul - investorlardy qorǵaý úshin negizgi institýt. Ol Niý-Iork, London jáne Dýbai qarjy ortalyqtarynyń úzdik tájiribesin qamtidy. Onyń úzdik aktsioneri - NASDAQ Goldman Sachs», - dedi Asqar Mamin.
Aita keteiik, forým jumysyna AQSh Saýda ministri Ýilbýr Ross pen QR Premer-Ministriniń birinshi orynbasary Asqar Mamin, 20-dan astam amerikalyq kompaniianyń basshylary, qazaqstandyq biznes ókilderi, ministrlikter men vedomstvo basshylary qatysty.
Shara aiasynda aýyl sharýashylyǵy, infraqurylym, aviaqurylys, tsifrlandyrý jáne aqparattyq tehnologiialar salalaryn qamtityn 8 ekijaqty qujatqa qol qoiyldy.
Esterińizge sala ketsek, AQSh-tyń Saýda ministri Ýilbýr Ross elimizge sapary aiasynda Elbasy Nursultan Nazarbaevpen kezdesip, sonymen birge QR Premer-Ministri Baqytjan Saǵyntaevpen ekonomikalyq yntymaqtastyq máselelerin talqylady.
