Úkimet basshysy, «Nur Otan» partiiasy Saiasi keńesiniń múshesi Asqar Mamin Elbasynyń tapsyrmasy boiynsha elimizde qolǵa alynǵan áleýmettik sharalar qalai iske asyrylyp jatqanyn baian etti, dep habarlaidy QazAqparat.
«Elbasy Nursultan Ábishuly Nazarbaevtyń tikelei bastamasymen qurylǵan «Nur Otan» partiiasy tarihi turǵyda qysqa merzimniń ishinde elimizdiń aldyńǵy qatarly saiasi kúshine ainaldy. «Nur Otan» - Qazaqstanda júrgizilip jatqan aýqymdy, saiasi jáne áleýmettik-ekonomikalyq reformalardy júzege asyrýshy partiia. Asa qadirli Elbasy, siz partiianyń aldyna kez kelgen ýaqyt synaǵyna sai jedel jáne sapaly jaýap berý mindetin qoidyńyz. Osy oraida partiia árqashanda kúrdeli máselelerdiń ońtaily jolyn taýyp, tiimdi sheshimder qabyldap keledi. Bizdiń ortaq maqsatymyz – halqymyzdyń ómir súrý sapasy men ál-aýqatyn arttyrýǵa, eldiń ekonomikalyq áleýetin arttyrýǵa, qoǵamnyń turaqtylyǵyn saqtaýǵa baǵyttalǵan partiia lideri Nursultan Ábishuly Nazarbaevtyń bastamalary men Prezident Qasym-Jomart Kemeluly Toqaevtyń sailaýaldy baǵdarlamasyn júieli túrde júzege asyrý. Jaýapkershiligi mol bul mindetterdi partiiamen tyǵyz qarym-qatynasta iske asyrýdamyz», - dedi Asqar Mamin.
Úkimet basshysy óz sózinde «Nur Otan» partiiasynyń HVIII sezinde Elbasy tapsyrǵan «Áleýmettik qamqorlyq» áleýmettik sharalarynyń qalai júzege asyrylyp jatqanyn baian etti.
«Sizdiń tapsyrmańyz boiynsha, osy jyldyń 1 sáýirinen bastap AÁK kólemi artty. 1 shildeden bastap bala kezinen múgedek balalardy baǵý úshin memlekettik járdemaqynyń kólemi ulǵaidy. 1 maýsymnan jalaqysy az biýdjet qyzmetkerleriniń ailyǵy 30 paiyzǵa deiin kóterildi. Al jergilikti atqarýshy organdardaǵy qyzmetkerlerdiń jalaqysy 25 paiyzǵa kóbeidi. «Nurly jer» baǵdarlamasyna ózgerister engizilip, Turǵyn úi jinaq banki arqyly az qamtylǵan otbasylarǵa jeńildetilgen nesieleý júiesi iske qosyldy. Bul mehanizm osy jyldyń shildesinde bastap iske qosyldy, aldaǵy úsh jylda bul baǵytta 50 mlrd teńgeden bólinedi«, - dedi Asqar Mamin.
Aita ketsek, elordada QR Tuńǵysh Prezidenti – Elbasy Nursultan Nazarbaevtyń tóraǵalyǵymen «Nur Otan» partiiasy Saiasi keńesiniń keńeitilgen otyrysy ótip jatyr.
.jpeg)