QR Premer-Ministri Asqar Mamin AQSh-qa jumys sapary aiasynda San-Frantsisko qalasyna baryp, onda tsifrlyq damý, venchýrlyq qarjylandyrý jáne energetika salasyndaǵy jetekshi álemdik kompaniialardyń basshylyǵymen kezdesýler ótkizdi, dep habarlaidy "Ult aqparat" primeminister.kz saityna silteme jasap.
Úkimet basshysy Dúniejúzilik ekonomikalyq forýmnyń (DEF) «Tórtinshi ónerkásiptik revoliýtsiia ortalyǵynyń» basshylyǵymen kezdesip, DEF basqarýshy direktory R. Samanspen innovatsiialyq tehnologiialardy retteý salasyndaǵy yntymaqtastyqtyń perspektivaly baǵyttaryn talqylady.
Kezdesý qorytyndysy boiynsha «Tórtinshi ónerkásiptik revoliýtsiia ortalyǵy» men «Astana» Halyqaralyq qarjy ortalyǵynyń (AHQO) arasynda Zattar internetin (IoT) damytýda strategiialyq áriptestik týraly qujatqa qol qoiyldy, bul 2020 jyly Qazaqstanda tórtinshi ónerkásiptik revoliýtsiia boiynsha DEF Úlestes ortalyǵyn qurýǵa jasalǵan alǵashqy qadam boldy. Mundai mekemeler jańa tehnologiialar men innovatsiialyq jobalardyń damýyn júieli memlekettik qoldaýdy qamtamasyz etýge yqpalyn tigize otyryp, Izrail, Úndistan, Qytai, BAÁ, Kolýmbiia, OAR, AQSh pen Japoniiada jumys isteidi.
Premer-Ministr A. Mamin «500 Startups» venchýrlyq qorynyń basshysy K. Tsaimen kelissóz ótkizdi, onyń qorytyndysy boiynsha «QazTechVentures» AQ qazaqstandyq ulttyq damý institýtyn «500 Startups» V Jahandyq qoryna qosý týraly kelisimge qol qoiyldy.
Bul qujat bolashaqta Qazaqstanda Taqyryptyq venchýrlyq qor qurýdy qarastyrady. Joba venchýrlyq qarjylandyrý men innovatsiialyq kásipkerliktiń damýyna serpin beredi, sóitip, startap kompaniialardy venchýrlyq kapitalmen qamtamasyz etedi.
A. Maminniń «Bright Sphere Investment Group» (BSIG) investitsiialyq tobynyń qarjy direktory S. Ranmen kelissóz qorytyndysy boiynsha Qazaqstandyq tikelei investitsiialar qory (KIDF) men BSIG arasynda 2020 jyly Qazaqstan aýmaǵynda infraqurylymdyq jobalardy qarjylandyrý úshin birlesken qor qurýda yntymaqtastyq týraly memorandýmǵa qol qoiyldy.
Qazaqstanda innovatsiialyq ekojúieni, venchýrlyq kapital men startap jobalardy damytý máseleleri A. Maminniń «Plug and Play» kompaniiasynyń basshylyǵymen áńgimesi barysynda qarastyryldy, onyń keńsesin «Astana Hub» alańynda ashý kózdelgen.
Úkimet basshysy «C3.ai» kompaniiasynyń bas atqarýshy direktory T. Sibelmen kelissóz kezinde QR munaigaz jáne basqa da sektorlarynda jasandy intellektini qoldanýda yntymaqtastyq máselelerin talqylady.
«Cisco» transulttyq kompaniiasynyń prezidenti G. Didrihpen kezdesýde «Tsifrlyq Qazaqstan» memlekettik baǵdarlamasynda bekitilgen maqsattarǵa qol jetkizýde jáne aqparattyq tehnologiialar salasynda yntymaqtastyqtyń jańartylǵan strategiiasyn iske asyrý máseleleri qaraldy.
«One Web» kompaniiasynyń bas atqarýshy direktory A. Shtekelmen kezdesý barysynda Qazaqstannyń aýmaǵyn, onyń ishinde shalǵaidaǵy jáne jetý qiyn aýdandardy jerseriktik bailanys arqyly jappai jyldamdyǵy joǵary keń jolaqty internetpen qamtý jobasyn iske asyrý perspektivalary qaraldy. Kelissóz qorytyndysy boiynsha AHQO Basqarýshysy Q. Kelimbetov jáne «One Web» basshysy A. Shtekel jobany odan ári ilgeriletý týraly qujatqa qol qoidy.
«Chevron» korporatsiiasynyń barlaý jáne ken óndirý jónindegi atqarýshy vitse-prezidenti D. Djonsonmen áńgimelesý kezinde Bolashaq keńeitý jobasy, «Teńizshevroil» jobasynda taýarlar men kórsetiletin qyzmetter boiynsha qazaqstandyq qamtýdy odan ári arttyrý, sondai-aq qazaqstandyq jumyskerlerdiń áleýmettik qamsyzdandyrylýy men eńbek jaǵdailaryn jaqsartý boiynsha birlesken sharalar ázirleý máseleleri talqylandy.
«ValvTechnologies» kompaniiasynyń prezidenti K. Hantpen kelissóz barysynda Qazaqstanda munaigaz sektory úshin klapandar men tiekter shyǵarý zaýytyn ashý múmkindigi qaraldy. Shyǵarylǵan ónimdi bolashaqta «Teńizshevroil»-dy keńeitý jobasyn iske asyrý aiasynda paidalaný, sondai-aq kórshiles elderdiń naryqtaryna eksporttaý josparlanǵan.
A. Mamin «42» kompiýterlik baǵdarlamalaý mektebiniń jáne IT salasyndaǵy «Qwasar» bilim berý kompaniiasynyń negizin qalaýshy K. Iamgnanemen kezdesý ótkizip, onymen Qazaqstannyń tsifrlyq ekonomikasy úshin mamandar daiarlaýdaǵy yntymaqtastyq perspektivalaryn talqylady.
Premer-Ministr «Tesla» kompaniiasynyń keńsesi men zaýytyn aralady, onda kompaniia basshylyǵymen kezdesý aiasynda Qazaqstanda janar-jaǵarmai quiý stantsiialary jelisin keńeitý jáne elektromobilder úshin servis ortalyqtaryn ashý máseleleri qaraldy.
