Qyrǵyzstannyń burynǵy prezidenti Asqar Aqaev Youtube-tegi "Avtor TV" arnasyna suhbat berdi. Onda ol óziniń prezidenttigi, otbasynyń el basqarý isine aralasýy, shekara máseleleri, Aksyi oqiǵasy jáne ózge jaittarǵa toqtalǵan, dep jazady Azattyq.
Aqaev 2005 jyly bilikti zańdy jolmen bermegenine ókinetinin jetkizgen.
"Táýelsizdik jyldary 15 jyl basqarǵan prezident retinde mende bir ókinish bar. Eger 2005 jyly sailaý ótip, bilikti óz qolymen tapsyrǵanymda, ókinbes edim. Menen qatelikter ketti. Biraq sonymen birge Qyrǵyzstanǵa kóp paida keltirdim dep te sanaimyn. Saiasi avantiýrister ádil sailaýda jeńiske jete almaitynyn túsindi, súitip meniń prezidenttik merzimim aiaqtalmai turyp tóńkeris jasap, bilikti basyp aldy. Sonyń keri áseri áli kúnge deiin jalǵasyp jatyr" dedi Aqaev.
Onyń pikirinshe, Qyrǵyzstanda bilikti kúshpen aýystyrý zańdylyqqa ainalǵan. Byltyr qazanda bolǵan oqiǵa sonyń dáleli dedi.
16 jyl buryn – 2005 jyly 24 naýryzda Qyrǵyzstanda tarihta "qyzǵaldaq" revoliýtsiiasy degen atpen belgili halyq tolqýy boldy. Azamattar parlament sailaýynyń nátijesine narazylyq bildirdi. 4 naýryzdan bastap jer-jerde bilik oppozitsiia qolyna óte bastady. Al 24 naýryzda Bishkekte oppozitsiialyq kúshterdiń iri mitingisi ótip, artynsha eldiń birinshi prezidenti Asqar Aqaev biligi qulatyldy. Ol otbasymen Máskeýge qashyp ketti.
