Almatyda bir aptada «sary» jáne «qyzyl» mártebesi bar 116 kelýshi anyqtaldy. Bul týraly Almaty qalasy Kásipkerler palatasynyń direktory Aitýar Qoshmambetov onlain brifing kezinde aitty, dep habarlaidy QazAqparat.
Aitýar Qoshmambetov jobany iske asyrý barysynda ol óziniń tiimdiligin dáleldep, qazirgi ýaqytta kásipkerlerge qatań shekteý sharalaryn qoldanbai jumys isteýge múmkindik berip jatqanyn aitty.
«Ózderińiz biletindei, pilottyq jobaǵa qatysýshylarǵa epidemiologiialyq jaǵdaidyń tómen turǵan aimaǵynyń jumysyn shekteý kriteriilerine sáikes jumys isteýge ruqsat etiledi. Mysaly «qyzyl» aimaqta pilottyq jobaǵa qatysatyn biznes obektileri «sary» aimaq kriteriileri boiynsha, «sary» aimaqta «jasyl» aimaq kriteriileri boiynsha jumys isteidi», - dedi ol.
27 sáýirdegi jaǵdai boiynsha «ASHYQ» qosymshasyn 402 256 qoldanýshy paidalanatyny belgili boldy. 19 sáýirdegi nátijelermen salystyrǵanda, iaǵni bir apta ishinde qosymshany paidalanýshylar sany 167 256 kóbeigen.
«12 sáýirden bastap respýblika boiynsha «qyzyl» mártebesi bar 849 adam, «sary» mártebesi bar 419 kelýshi osy qosymsha arqyly anyqtaldy. Bul 19 sáýirdegi nátijelermen salystyrǵanda 574 kelýshige kóp. Sońǵy bir apta ishinde Almaty qalasy boiynsha «sary» jáne «qyzyl» mártebesi bar 116 kelýshi anyqtaldy, - dedi Aitýar Qoshmambetov.
26 sáýir kúni Nur-Sultan qalasy boiynsha «qyzyl» mártebemen – 25 kelýshi, «sary» mártebemen – 54 kelýshi, Almaty qalasy boiynsha «qyzyl» mártebemen – 9 kelýshi, «sary» mártebemen – 8 kelýshi anyqtalǵan.
Onyń aitýynsha, «ASHYQ» pilottyq jobasyna qatysýǵa niet bildirgen kásipkerler sany kún saiyn artyp keledi. Sondai-aq, qarjy uiymdarynan, joǵary oqý oryndarynan, iri kompaniialardyń keńselerinen joba qatysýshylaryna tiesili jeńildiktersiz qosymshany ornatý múmkindigin qarastyrý jóninde ótinishter túsýde.
