Aqparatqa qol jetkizý máseleleri jónindegi komissiianyń otyrysynda «Ashyq Úkimet» portalyna shaǵym kóbeigeni sóz boldy, dep habarlaidy "Ult aqparat".
«Saladaǵy basym jáne osal tustardy taldaý derekterin negizge ala otyryp, kezek kúttirmei sheshýdi talap etetin problemalardyń tizimin anyqtadyq. Birinshiden, memlekettik organdardyń qolyndaǵy málimetterdi jinaqtap, saqtaý kezinde aqparattyq ashyqtyq printsipi saqtalmaidy. Bul printsip búkil aqparat ashyq ári qoljetimdi bolý kerek degendi bildiredi. Oǵan shekteý qoiý úshin naqty negiz bolýy kerek. Onyń ózinde ol shekteý ýaqytsha sipatta bolýy tiis», - dedi QR Aqparat jáne qoǵamdyq damý ministrligi Memleket pen qoǵam kommýnikatsiialaryn damytý departamentiniń direktory Bekzat Rahimov.
Ministrlik ókili aqparatqa qol jetkizý quqyǵyn buzýshylarǵa zańnamamen qarastyrylǵan jaýapkershilik tym shekteýli ekenin taǵy eske saldy. Mysaly, Aqparatqa qol jetkizý týraly zańda talap buzylsa, jaýapkershilik bar ekenin aitylǵanymen imperativti normalar bekitilmegen kórinedi. Sonyń saldarynan aqparat iesi qajetti málimetti ýaqytynda jáne tolyq kólemde bermegeni úshin eshqandai jaýapkershilik arqalamaitynyn biledi.
«Úshinshiden, jeke ómirge qol suqpaý quqyǵy men aqparatqa qol jetkizý quqyǵynyń arasyndaǵy teńgerimdi saqtai bilý qajet. Sondyqtan, jeke málimetterdi qorǵaý talaptary aqparatqa qol jetkizý saiasatynyń qosymsha bóligine ainalyp otyr. Kóptegen elderde aqparattyń qoljetimdiligine jaýapty organdar derekterdi qorǵaý qyzmetin birge atqarady», - degen Bekzat Rahimov halyqtyń aqparatqa qol jetkizý jónindegi quqyqtyq bilimi tómen ekenin atap ótti.
Júrgizilgen áleýmettik zertteýler Qazaqstan qoǵamy óziniń aqparatqa qol jetkizý quqyqtary týraly az biletinin kórsetedi.
«Besinshiden, «Ashyq úkimet» portaldary tehnikalyq turǵydan eskirgen jáne qoǵamnyń suranysyna jaýap bere almai otyr. Jumys kezinde paida bolatyn qatelikterdiń kesirinen portaldyń ashylmaýy, personaldyń ikemsizdigi memlekettik organdar tarapynan da, qoǵam tarapynan da jii synǵa ushyraidy.
Altynshydan, halyqaralyq printsipter men usynymdar aqparatqa qol jetkizý týraly zańnamanyń oryndalýyn baqylap, qadaǵalaityn táýelsiz organnyń bolýy kerektigin meńzeidi. Mundai organnyń eń mańyzdy qyzmeti shaǵymdardy der kezinde qabyldap, sonyń negizinde mindetti túrde sheshim qabylaý bolýy kerek», - dedi departament direktory.
