Qazaqstanda qyrylǵan 588 myń taýyqtyń 329 myńy qus tumaýynan ólgen. QR AShM Veterinarlyq baqylaý jáne qadaǵalaý komiteti tóraǵasynyń mindetin atqarýshy Tursyn Qabdoldanov qalǵany – tabiǵi shyǵyn ekenin málim etti, dep habarlaidy "Ult aqparat".
«Biz búgingi kúni búkil respýblika aýmaǵyndaǵy qustyń shyǵynyn túgendep otyrmyz. Halyq qazir bir qus ólip qalsa da habarlaidy. Qyzylorda máselen 12 qus óldi. Ol týraly aqparat keldi. Biz báriniń synamasyn alyp, zerthanada tekseremiz. Zerthana aparǵan synamamyzdyń 50 paiyzynyń joǵarysy - qus tumaýyn anyqtamaidy. Arasynda tabiǵi shyǵyn bolady», - dedi Tursyn Qabdoldanov OKQ-da ótken baspasóz máslihatynda.
Onyń aitýynsha Qazaqstanda osy ýaqytqa deiin qyrylǵan 588 myń taýyq kómilip, esepke alynǵan.
«Biraq onyń ishinde tek qus tumaýynan ólgenderi – 329 651 bas. Ár basynyń ózi anyqtalyp, solar úshin ǵana aqy tólenetinin habarlap otyrmyz», - dedi ol.
Al óz kezeginde Aýyl sharýashylyǵy vitse-ministri Gúlmira Isaeva Túrkistan oblysynda, Aqtóbe oblysynda, Shymkentte, Jambyl oblysynyń bir aýdanynda, Aqmola oblysynyń bir aýdanynda, Pavlodar oblysynyń bir aýdanynda, Qaraǵandy jáne SQO tórt eldimekeninde qus tumaýynyń rastalmaǵanyn jetkizdi.
